Бүгүн саҕаламмыт алтыс ыҥырыылаах Ил Түмэн бастакы пленарнай мунньаҕын «Саха Өрөспүүбүлүкэтин Судаарыстыбаннай Мунньаҕын туһунан» сокуоҥҥа сөп түбэһиннэрэн, Судаарыстыбаннай Мунньах Бэрэссэдээтэлэ талыллыар диэри норуот дьокутааттарыттан саамай аҕа саастаахтара Алдан улууһуттан дьокутаат Роза Солнышкина салайда.
edersaas.ru
Бастатан туран, быыбар Киин хамыыһыйатын бэрэссэдээтэлэ Алексей Ефимов өрөспүүбүлүкэ сокуону таһаарар үрдүкү уорганын быыбарын түмүгүн иһитиннэрдэ. Киин уонна уокуруктардааҕы быыбардыыр хамыыһыйалар норуот дьокутааттарын талыы сокуоҥҥа сөп түбэһиннэрэн тэриллэрин хааччыйбыттарын эттэ. Алтыс ыҥырыылаах Ил Түмэҥҥэ талыллыбыт 70 норуот дьокутаатыттан 41 дьокутаат саҥа талыллан, дьокутааттар састааптарын 58,6 %-а саҥардыллыбыт. Баартыйаларынан көрдөххө, «Биир ньыгыл Арассыыйа» баартыйа 43, КПРФ уон, «Сиэрдээх Арассыыйа» тоҕус, ЛДПР түөрт, «Гражданскай платформа» баартыйа биир дьокутааттаммыттар, үс дьокутаат бэйэтэ туруоруммут. Мунньах мандатнай хамыыһыйатын бэрэссэдээтэлэ дьокутаат Михаил Гуляев иһитиннэрбитинэн, 64 дьокутаат үрдүк үөрэхтээх. 54 дьокутаат Дьокуускайга, түөрт дьокутаат Нерюнгри, иккилии дьокутаат Ленскэй, Өлүөхүмэ, Мэҥэ Хаҥалас улуустарга, биирдии дьокутаат Алдаҥҥа, Мирнэйгэ, Хаҥаласка, Уус Алдаҥҥа, Чурапчыга олороллор. 19 дьокутаат судаарыстыбаннай былаас уонна олохтоох салайыныы уорганнарыгар, 14 дьокутаат экономика производственнай салааларыгар үлэлииллэр, 14 дьокутаат предприниматель, 48 дьокутаат тэрилтэ салайааччыта эбиттэр.
Ил Түмэн бэрэссэдээтэлигэр «Биир ньыгыл Арассыыйа» баартыйа фракцията Петр Гоголевы туруорда, атын баартыйалар фракциялара ону өйүүллэрин эттилэр. Кистэлэҥ куоластааһыҥҥа биир эрэ дьокутаат туттунна, атыттар сөбүлэһэллэрин биллэрдилэр.
— Саҥа талыллыбыт парламент бастакы мунньаҕа Судаарыстыбаннас күнүн көрсө ыытыллыбыта элбэҕи этэр. Биһиги хас биирдиибит парламент үлэтэ өрөспүүбүлүкэ нэһилиэнньэтин олоҕун хаачыстыбатын тупсарыыга ананарын өйдүөхтээхпит. Үлэбитин-хамнаспытын Айсен Николаев быыбар иннинээҕи бырагырааматын олоххо киллэриини, быыбардааччыларбыт туруорсууларын толорууну кытары ситимниэхтээхпит. Ааспыт ыҥырыылаах Ил Түмэн үлэтин салгыы сайыннарыахтаахпыт, Арассыыйа атын, чуолаан Уһук Илин эрэгийиэннэрин судаарыстыбаннай мунньахтарын кытары бииргэ үлэлээһини күүһүрдүөхтээхпит, — диэтэ саҥа спикер, итиэннэ бастайааннай үлэлиир Сүбэлэһэр уорган тэриллэрэ, онно ааспыт ыҥырыылар дьокутааттара киирэллэрэ наадатын эттэ.
Раиса Сибирякова, edersaas.ru