Бүгүн, муус устар 26 күнүгэр, Ил Түмэҥҥэ Саха сирин историятын кэрэһэлиир көһө сылдьар быыстапка арылынна. Быыстапкаҕа «Симэх» норуот прикладной ускуустубатын национальнай киинин оҥоһуктара эмиэ киирдилэр. Маны сэргэ П.П.Романов аатынан Дьокуускайдааҕы художественнай училище устудьуоннарын САССР 100 сылыгар анаммыт уруһуйдара ыйаннылар.
Быыстапка үөрүүлээхтик аһыллыытын Национальнай үҥкүү тыйаатырын хомусчуттара, Олоҥхо тыйаатырын артыыстара киэргэттилэр. Ол курдук ыҥырыылаах ыалдьыттары хомус дьүрүйэр тыаһынан доҕуһуоллаатылар, алгыс тылларынан көрүстүлэр.
Экспозиция 90-тан тахса стендэттэн турар. Ил Түмэн иккис, үһүс этээстэригэр көрүдүөргэ ыйаммыттар. Манна Саха сирин историятын кэпсиир, билиһиннэрэр араас хаартыскалар, докумуоннар уонна уруһуйдар киирбиттэр.
Эҕэрдэ тыл этэригэр СӨ Судаарыстыбаннай сүбэһитэ Андрей Борисов, художественнай училище устудьуоннара кыттыбыттарын бэлиэтээн туран, бу быыстапка үүнэр көлүөнэни иитиигэ сүҥкэн оруоллааҕын аннынан тарта. “Ыччат бу маннык тэрээһиҥҥэ кыттара кини историяны салгыы үөрэтэригэр, төрүттэринэн киэн туттарыгар төһүү буолар”, — диэтэ кини.
РНА СО Саха сиринээҕи научнай киинин генеральнай дириэктэрэ Михаил Лебедев бастакы научнай экспедиция суолтатын тоһоҕолоото. Маннык улахан суолталаах экспедиция өссө ханна да ыытылла илик. 27-лээх эрэ Максим Аммосов бу экспедиция кэлэрин туруорсан, сурук ыытан, Саха сирин кэнэҕэс сайдыытын акылаатын ууран турар.
Ыалдьыттары Ил Түмэн сис кэмитиэтин бэрэссэдээтэлэ Владимир Прокопьев, Ил Түмэн бэрэссэдээтэлин сүбэһитэ Анна Атласова, художественнай училище дириэктэрэ Кирилл Гаврильев, «Симэх» норуот прикладной ускуустубатын национальнай киинин дириэктэрэ Яна Игнатьева эҕэрдэлээтилэр.
Быыстапканы РФ Дизайнерын сойууһун чилиэнэ Ариан Ермолаев иилээн-саҕалаан туруорда. Научнай консультанынан Саха сирин мусуойуун историяҕа салаатын салайааччыта Семен Окоемов үлэлэстэ.
Ил Түмэн Пресс-сулууспатын хаартыскалара