Ил Түмэн: Спикер Петр Гоголев Госдуума дьокутаата Галина Данчикованы кытары көрүстэ
Ил Түмэн Бэрэссэдээтэлэ Петр Гоголев Госдуума дьокутаата Галина Данчикованы кытары көрсөн, Саха Өрөспүүбүлүкэтин парламеныттан Госдуумаҕа туруорсуллар сокуон барылларын тула кэпсэттилэр.
edersaas.ru
Кэпсэтиини саҕалыырыгар, Галина Данчикова алтыс ыҥырыылаых Ил Түмэн дьокутааттарын саҥа үлэ кэмэ саҕаламмытынан эҕэрдэлээтэ. Ааспыт ыҥырыылаах Ил Түмэн таһаарыылаахтык үлэлээбитин, өрөспүүбүлүкэ олоҕун-дьаһаҕын бары эйгэтин сокуон-быраап өттүнэн салайыыга улахан кылаатын киллэрбитин итиэннэ федеральнай сокуоннары оҥорууга көхтөөхтүк үлэлээбитин бэлиэтээтэ. Салгыы Госдуумаҕа билигин көрүүгэ сылдьар Саха Өрөспүүбүлүкэтэ киллэрбит сокуоннарын бырайыактарын, көҕүлээһиннэрин тустарынан кэпсээтэ. Ил Түмэн саҥа састаабыгар бу сокуон бырайыактарын дириҥник үөрэтэргэ уонна ордук чорботуллар хайысхалары быһаарарга сүбэлээтэ. Кэлэр өттүгэр Ил Түмэн сис кэмитиэттэрин бэрэссэдээтэллэрин кытары көрсөн, инники үлэни-хамнаһы торумнуур уонна Федеральнай Мунньахха киллэриллэр көҕүлээһиннэри сүбэлэһэн бэлэмниир туһунан кэпсэтиэхтээх.
Петр Гоголев сүбэтин-аматын иһин Галина Данчиковаҕа махтанна. Ил Түмэн саҥа састааба үлэлииргэ олохтоохтук оҥостубутун эттэ.
— Биһиги сыалбыт-сорукпут дьэҥкэ: Арассыыйа Бэрэсидьиэнэ Владимир Путин Федеральнай Мунньахха Анал этиитигэр, Ил Дархан Айсен Николаев бырагырааматыгар туруорбут соруктарын толорууга үлэлииргэ Парламент бэлэм. Бу үлэ түмүктээх буоларын туһугар биһиги утумнаахтык үлэлиэхпит, — диэтэ спикер итиэннэ Ил Түмэн биир сүрүн үлэтинэн ылыллар сокуоннар, нуорма-быраап акталара олоххо киириилэригэр хонтуруолу уонна хаачыстыба мониторинын тэрийии буоларын, Ил Түмэн иһинэн Федерация Сэбиэтин, Госдуума уонна Ил Түмэн ааспыт ыҥырыыга дьокутааттарын киллэрэн, Сүбэлэһэр уорган тэриллэрин эттэ.
Раиса Сибирякова, «Саха сирэ» edersaas.ru.