Бүгүн Ил Түмэн уочараттаах XXXI пленарнай мунньаҕар “Биир ньыгыл Россия” баартыйа испииһэгинэн Иван Андросов оннугар урукку сылларга Ыччат бэлиитикэтин миниистиринэн үлэлии сылдьыбыт Константин Борисов дьокутаат аатын сүктэ. Санатан эттэххэ, Иван Андросов “Биир ньыгыл Россияттан” Таатта, Томпо уокуругар дьокутааттыы олорон Быыбар киин хамыыһыйатыгар үлэлии барбыта.
Константин Борисов 1967 сыллаахха тохсунньу 3 күнүгэр Алексеевскай оройуон Туора Күөлүгэр төрөөбүтэ. 1992 с. СГУ бүтэрээт, устудьуоннар куораттарыгар дириэктэринэн анаммыта. Салгыы Ыччат дьыалатын, спорт, туризм министиэристибэтигэр ыҥырыллан, 1996 с. диэри үлэлээбитэ.
1996 с. Томпо улууһун баһылыгын социальнай боппуруостарга солбуйааччынан үлэлии барбыта. Манна икки сыл үлэлээн баран, төттөрү Ыччат дьыалатын министиэристибэтигэр кэлэн миниистири бастакы солбуйааччынан үлэлээбитэ. Онтон 2000 с. миниистиринэн анаммыта.
2005 с. Президент уонна бырабыыталыстыба дьаһалтатыгар Каадыр бэлиитикэтин департаменын салайааччытын солбуйааччынан үлэлээбитэ. Онтон 2007 с. Салайар институт ректорынан, кэлин Сибээс уонна энергетика колледжын дириэктэринэн анаммыта.
Константин Афанасьевич – экономическэй наука кандидата, сүүрбэттэн тахса научнай үлэ ааптара. Физкультура, спорт, ыччат бэлиитикэтин, профессиональнай үөрэхтээһин туйгуна.
Аграфена КУЗЬМИНА, “Саха сирэ” хаһыат, edersaas.ru.