Ил Түмэн пленарнай мунньаҕа: Сулустаана Мыраан тоҕо биир да кэмитиэккэ киирбэтэ?

Алтыс ыҥырыылаах Ил Түмэн бастакы пленарнай мунньаҕын бүгүҥҥү үлэтин сис кэмитиэттэр уонна хамыыһыйалар чилиэннэрин быһаарыыттан саҕалаата. Сокуон быһыытынан, биир дьокутаат үстэн итэҕэһэ суох кэмитиэккэ үлэлиэн сөп. Ол эрээри, ханнык бириинсибинэн салайтарбыттара буолла, барыллааһын испииһэгинэн сорох дьокутааттар биир да кэмитиэккэ киллэриллибэтэхтэр. Холобур, Виктор Губарев Хонтуруоллуур кэмитиэккэ хомуньуустар фракцияларыттан биир да дьокутаат суоҕун сыыһанан аахта.

Хаҥалас улууһуттан хаһыс да болдьоҕун дьокутаат Алиш Мамедов ханнык да кэмитиэккэ суох буолан соһутта. Тутааччы идэлээх киһи тутууга сыһыаннаах кэмитиэккэ үлэлиирэ быдан көдьүүстээҕэ учуоттамматах. Эмиэ кэмитиэттэн маппыт Сулустаана Мыраан бэҕэһээ киэһэ, барыллаан испииһэк оҥоһуллар кэмигэр, Сиргэ сыһыаннаһыы, айылҕа ресурсаларын уонна экология сис кэмитиэтигэр  итиэннэ Судаарыстыбаннай тутул уонна сокуону оҥоруу сис кэмитиэтигэр киирэргэ туруорсубута ылыллыбатах. Ол иһин, тыл ылан бэркэ итийэн-кутуйан туран:

— Үлэлииргэ оҥостон кэлбит хайысхабынан үлэлиирбин хааччыйарга көрдөһөбүн. Уопсайынан, убаастабыллаах уонна убаастабыла суох диэн критерийдэринэн сирдэтиини сыыһанан ааҕабын, саҥа талыллыбыт дьокутааттары туохпутун-ханныкпытын билбэккэ сылдьан, кэмитиэккэ мээнэ симэргэ сөбүлэспэппин, — диэтэ.

Дьүүллэһии кэнниттэн спикер Петр Гоголев кэмитиэттэр састааптарын өссө биирдэ көрүөҕүҥ, сааһылыаҕыҥ диэн, пленарнай мунньахха биир чаастаах тохтобулу биллэрдэ.

Раиса Сибирякова, «Саха сирэ» edersaas.ru.