Уопсастыба

Ил Түмэн дьокутаата Елена Голомарева икки сокуон барылын оҥорор федеральнай бөлөххө эксперт буолла

Бу күннэргэ Ил Түмэн аҕыйах ахсааннаах хотугу норуоттар уонна Арктика дьыалаларын боппуруостарыгар сис  кэмитиэтин салайааччыта Елена Голомарева Москваҕа РФ Хотугу сир, Сибиир уонна Уһук Илин аҕыйах ахсааннаах хотугу норуоттарын ассоциациятын бэрэсидьиэнэ Григорий Ледковы кытта көрүстэ.

Көрүллүбүт сүрүн боппуруос – аҕыйах ахсааннаах төрүт норуоттар бырааптарын уонна интэриэстиэрин көмүскээһин. Елена Голомарева бу көрсүһүү сүнньүнэн санаатын маннык үллэһиннэ:

Арктика сайдыытыгар дойду таһымыгар улахан хамсааһыннар бара тураллар. Сокуон өттүнэн харыстаныы наадата көстөр. Ол курдук, олохтоох дьон төрүт дьарыктарын инникитэ, олохторун оҥкула онтон тутулуктаах буолуоҕа. РФ Хотугу сир, Сибиир уонна Уһук Илин аҕыйах ахсааннаах хотугу норуоттарын ассоциациятын бэрэсидьиэнэ Григорий Ледков Саха сирин аҕыйах ахсааннаах норуоттарын олохторо тупсарыгар үлэлэһэрин уонна онно туһаайыллыбыт сокуоннар дойду үрдүнэн холобур буолалларын туһаайда.

Көрсүһүү түмүгүнэн норуот дьокутаата Елена Голомарева икки федеральнай оробуочай бөлөххө: үгэс буолбут дьарыкка — балыктааһыҥҥа уонна дьиэ табатын иитиигэ федеральнай сокуон барылын оҥорор бөлөхтөргө эксперт быһыытынан киирдэ.

 

Елена ПОТОЦКАЯ, “Саха сирэ” хаһыат, edersaas.ru

0
0