Ил Түмэн аграрнай кэмитиэтэ үбүлээһини улаатыннарарга салгыы үлэлэһэр
Ил Түмэн тыа сиригэр уонна аргарнай бэлиитикэҕэ сис кэмитиэтин бэрэссэдээтэлэ Андрей Находкин СӨ бааһынай хаһаайыстыбаларын уонна тыа хаһаайыстыбатын кэпэрэтииптэрин ассоциациятын сэбиэтин чилиэннэрин кытта көрсөрүгэр: “Тыа хаһаайыстыбатын сайыннарыы сокуона эһиги үлэҕитигэр-хамнаскытыгар төһө көдьүүстээҕий? Этиилэргитин биһиэхэ киллэриҥ”, — диэтэ.
Андрей Михайлович Ил Түмэн тустаах кэмитиэтэ Тыа хаһаайыстыбатын министиэристибэтин кытта биир сүбэнэн үлэлиирин, үүнэр сылга үүт соҕотуопкатыгар көрүллэр харчыны 2 млрд 700 мөлүйүөҥҥэ диэри таһаарар уонна тыа хаһаайыстыбатын үбүлээһиҥҥэ 500-тэн тахса мөлүйүөн солкуобайы эбии көрдөрөр ситиһиллибитин эттэ. Ити гынан баран, тыа хаһаайыстыбатын бырагырааматын үлэлэтэргэ көрүллүбүт 10 млрд 600 мөлүйүөн солкуобай Ил Дархан “СӨ АПК-ын сайыннарыы стратегическай хайысхаларын туһунан” Ыйааҕар ыйыллыбыт дьаһаллары олоххо киллэрэргэ тиийбэт. Онон дьокутааттар бу хайысхаҕа салгыы үлэлэһиэхтэрэ.
Андрей Находкин бааһынайдарга уонна кэпэрэтииптэргэ сыһыаннаах биир улахан кыһалҕа баарын таарыйда. Ол – сылгыны үөрдээн иитии. Сыспай сиэллээхтэрбит сайыны быһа ынах сүөһүлүүн бииргэ бөһүөлэктэр истэригэр эбэтэр кытыыларыгар мэччийэллэр. Сылгыны нэһилиэнньэлээх пууннартан тэйиччи тутан иитии кумааҕыттан дьыалаҕа көһө илик. Сис кэмитиэт салайааччыта, аны саас, Сылгыһыт күнүн кэнниттэн тута өрөспүүбүлүкэ таһымыгар сүбэ мунньаҕы тэрийэр былааннааҕын билиһиннэрдэ.
Василий НИКИФОРОВ, «Саха сирэ» хаһыат, edersaas.ru
Анна СЕРГУЧЕВА (ТХМ пресс-сулууспата) хаартыскаҕа түһэриитэ.