Бүгүн Ил Түмэн судаарыстыбаннай тутулга уонна олохтоох бэйэни салайыныы сис кэмитиэтин мунньаҕар улуустар, нэһилиэктэр уларыйыыларын туһунан федеральнай сокуон барылыгар этиилэри киллэриини көрдүлэр. Норуот дьокутааттара 50 уларытыы киирбититтэн уон сүрүн боппуруоһу көтөхтүлэр.
Санатан эттэххэ, федеральнай сокуон барыла Судаарыстыбаннай Дуумаҕа тохсунньу 25 күнүгэр бастакы ааҕыыга ылыныллыбыта. Эрэгийиэннэр олунньу 23 күнүгэр диэри бэйэлэрин уларытыыларын киллэрэр бырааптаахтар.
Федеральнай сокуон барылыгар уларытыылары киллэриини чөкөтөргө Ил Түмэҥҥэ анал оробуочай бөлөх тэриллибитэ. Бу бөлөххө федеральнай сокуон барыла бастакы ааҕыыта ылыныллыан иннинэ барыта 150-ча этии, онтон иккис ааҕыытын кэмигэр муниципальнай тэриллиилэртэн, дьокутааттартан 50-тан тахса этии киирбитэ.
Сис кэмитиэт бэрэссэдээтэлэ Владимир Прокопьев бэлиэтээбитинэн, үгүс этии хатыланарынан бу киирбит боппуруостартан сүрүннэрин сүһэн ылбыттар. Бастатан туран, дьокутааттар манна эрэгийиэн уратытын учуоттааһын, олохтоох бэйэни салайыныы сүрүн бириинсиптэрин хаалларыы, эрэгийиэннэр үгүс боппуруоһу бэйэлэрин истэригэр быһааралларын, олохтоох салайыныы эрэгийиэннэр сокуоннарынан салайтаралларын ситиһии курдук тыын боппуруостары болҕомтоҕо ыллылар. Ол иһигэр дьокутааттар сокуон барылын 84-с ыстатыйатыгар ыйыллыбыт сорох сирдэргэ (Арктическай зонаҕа, Уһук Хоту сиригэр уотугар уо. д.а. баар) олохтоох салайыныы тэрийии уратытын бигэргэтэри РФ субъегын кытта хайаан да сөбүлэһиннэрэри туруорсаллар.
Ил Түмэн кэмитиэтэ туох этиилэри киллэрбитин сиһилии релизка билсиҥ. Киэҥ ыҥырыылаах мунньах быһа эпииргэ буолбута.
Норуот дьокутааттара бу этиилэри Ил Түмэн олунньу 15 күнүгэр ыытыллыахтаах пленарнай мунньахтарыгар бигэргэтэн, салгыы Судаарыстыбаннай Дуумаҕа ыытыахтара.
Киэҥ ыҥырыылаах кэмитиэт мунньаҕын кэнниттэн Владимир Прокопьев санаатын эттэ. Видеону көрүҥ.
Аграфена КУЗЬМИНА