Бүгүн Ил Түмэн тыа хаһаайыстыбатыгар оҥорон таһаарыыга туһуламмыт улахан «төгүрүк остуола» ZOOM платформа нөҥүө буолла.
Манна бырабыыталыстыба бэрэссэдээтэлин солбуйааччы Михаил Викторович Никифоров, тыа хаһаайыстыбатын миниистирэ Александр Павлович Атласов уонна улуустар, нэһилиэктэр баһылыктара кыттыннылар.
Сүрүн долгутар боппуруоһунан үгүстэри үүтү тутуу саҥа ньымата, ыанар ынах төбөтүгэр төлөнөр 35 тыһыынча солкуобай уонна өрөспүүбүлүкэҕэ оҥорон таһаарыыны хайдах тупсарыы буолар. Үөһээ Бүлүү улууһун Ороһу нэһилиэгин баһылыга Анатолий Антонов нэһилиэгэр тыа хаһаайыстыбатын үлэтин, туругун туһунан кэпсээн, үгүс улуустарга холобур буолуон сөптөөх дьаһанан олоруу туһунан сырдатта. Кэпсэтиигэ ытык кырдьаҕас Чурапчыттан Иван Пономарев быһа сибээскэ холбонон санаатын үллэһиннэ
Бу туһунан сиһилии «Саха сирэ» хаһыат кэлэр нүөмэригэр ааҕыҥ.
Ульяна Захарова, edersaas.ru