Куһаҕан сурах түргэнник тарҕанар. Бүгүн Ил Түмэн дьокутааттара улахан пленарнай мунньахха олордохторуна бэрээдэги араҥаччылааччылар эмискэ көтөн түһэн, суохтарына хосторугар дьэҥдьиир оҥордулар.
Бүддьүөккэ, үпкэ-харчыга, нолуокка, сыана бэлиитикэтигэр, бас билии уонна приватизация боппуруостарыгар бастайааннай кэмитиэт бэрэссэдээтэлин Юрий Николаев, тыа сиригэр уонна аграрнай бэлиитикэҕэ кэмитиэт бэрэссэдээтэлэ Дмитрий Саввин, хонтуруоллуур кэмитиэт бэрэссэдээтэлэ Александр Уаров хосторугар киирэн, докумуоннары хостоон, илдьэ барбыттар. Тугу да сэрэйбэккэ мунньахтыы олорбут дьокутааттар соһуйан эрэ хааллылар. Билигин икки дьокутаакка дьыала тэриллэн эрэрин туһунан бигэргэтиллэ илик информация баар.
edersaas.ru
Санаалар
Уорбаҕа хапсыбатах норуот дьокутааттара үөскээбит быһыы-майгы туһунан маннык этиннилэр:
Виктор Федоров: «Дьэҥдьиир туһунан истибитим эрээри, бэйэм харахпынан көрбөтөҕүм. Киһи өйүгэр баппат быһыы-майгы!».
Василий Власов: «Бу кэпсэтиигэ бэлэмэ суохпун».
Гульсум Бейсембаева: «Официальнай эппиэти тустаах дьон биэриэхтэрэ. Дьэҥдьиири илэ харахпынан көрбөтөҕүм. Таҥара көмөтүнэн миигин тыыппатылар».
Зоя Корнилова санаата
Зоя Корнилова, урут, бэйэтин кэмигэр Москваҕа Үрдүкү Сэбиэти тааҥканан ытыалааһыны тулуйбут дьокутаат, билигин биэнсийэлээх:
— Бэлиитикэттэн тэйбитим ыраатта. Ким, кимиэхэ, тугу гыммытын билбэппин. Дьыала хайдаҕын-тугун сэлиэстийэ быһаарыа дии саныыбын.
Блогер санаата
Алексей Васильев-Баһылай, биллэр блогер тус страницатыгар маннык суруйда:
— Бэрик ылар дьону туталлара саамай сөп, ол эрэн, тоҕо Саха Өрөспүүбүлүкэтин күнүгэр итинник «бэлэх» оҥордулар? Нэдиэлэ эрдэлээн, эбэтэр хойутаан кэлэр кыаллыбат эбит буоллаҕа дуу?
Юрий Николаев санаата
Оттон уорбалаанааччылартан биирдэстэрэ Юрий Николаев бу курдук этэр:
— Дьэҥдьиир буола турарын көрбөтөҕүм, туох буолбутун социальнай ситимнэртэн аахтым. Миигин ким да туппатаҕа, мунньахтыы олорбутум.
Силиэстийэлиир кэмитиэт ханнык да комментарий биэрэ илик.
Марианна Тыртыкова, edersaas.ru