Айылҕа харыстабыла

«Ил Дарханныын кэпсэтии»: биир санаалаах буолуоҕуҥ

«Саха» НКИХ ханаалыгар «Ил Дарханныын кэпсэтии» биэриигэ өрөспүүбүлүкэ баһылыга Айсен Николаев ойуур баһаарын утары умуруорууга ыытыллар үлэлэр тустарынан кэпсээтэ.

Дьокуускай баһаар буруотунан бүрүллэн, дьон-сэргэ айманар, хайдах харыстанары ыйыталаһар.

Ил Дархан Айсен Николаев:

— Бу буруо бүгүн, сарсын сүтэн хаалар диир кыаҕым, хомойуох иһин, суох. Ойуур баһаардара лаппа улахаттар. Төгүрүтүлүннэхтэринэ даҕаны, баһаар умуллуор диэри син биир хас да күн ааһар. Тыал уларыйыа диэн күүттэрэллэр уонна зондировщик сөмөлүөт көмөтүнэн былыттар кэлэннэр ардахтар түстэхтэринэ балаһыанньа чэпчиэхтээх.

Роспотребнадзор Саха сиринээҕи управлениетыгар сорудах биэрэн турабын, күҥҥэ хаста да салгыммыт туругун дьоҥҥо биллэриҥ диэн. Күн аайы иһитиннэрэ тураллара саамай сөп. Роспотребнадзор Саха сиринээҕи салаата киһи сылдьар сиригэр барытын чуолкайдыыр. Доруобуйа харыстабылын министиэристибэтигэр эмиэ суһал көмө тэтимнээхтик үлэлииригэр сорудах бэрилэ. Билигин ордук астмалаах, тыҥалара ыалдьар дьоҥҥо кутталлаах күн-дьыл турар. Онон көмө суһаллык оҥоһуллан иһэрэ наада. Биһиги көрөрбүтүнэн, билигин күҥҥэ 15-20 суһал ыҥырыы көмөтүгэр наадыйыы баар. Мэдиссиинэ суһал көмөтө ону барытын быһааран иһэр.

 

Билиҥҥи балаһыанньаҕа дьон арааһы суруйар. Сорохтор наадалааҕы, оттон сорохтор дойҕоҕу суруйаннар, дьону-сэргэни буккуйар курдуктар.

—Дьоммор-сэргэбэр этиэм этэ, биһиги куруук сомоҕолоһуулаахпытынан, түмсүүлээхпитинэн биллэр этибит. Оннук буолуохпутун наада. Бары ыһыллан уҥа-хаҥас сырыттахпытына, бэйэбитигэр да көмөлөһөр кыахпыт суох буолуоҕа.

Биһиги бары өйдөөх, муударай буоларбыт наада. Бырабыыталыстыба, суһал ыстаап балаһыанньаны көрө-истэ олорор. Сорохтор «Хонтуруол диигит. Онтугут ханна баарый? Баһааргыт элбии турар» дииллэр. Оттон хонтуруол диэн биһиги тугу ааттыыбытый? Күн бүгүҥҥэ диэри ханнык да нэһилиэкпитигэр ойуур баһаарыттан дьиэ умайбата, биир да нэһилиэккэ уот киирбэтэ. Ол буолар, хонтуруол.

Айылҕа уларыйыытыттан күүстээх тыаллаах, күүстээх уот турдаҕына, ону утары киирсэр кыах да суох буолар быһыылаах, сороҕор. Билигин биһиэхэ балаһыанньабыт төһө да ыараханын, ойуур баһаардара элбэҕин иһин, этэҥҥэ биир да мөкү түбэлтэни таһаарбатыбыт уонна таһаарбат туһугар туох баар сырабытын, болҕомтобутун уурабыт.

Саха сирин олохтоохторо! Бары түмсүүлээх буолуоҕуҥ, сомоҕолоһуоҕуҥ, биир санаанан ойуур баһаардарын утары туруулаһыаҕыҥ. Оччоҕуна кыайыылаах тахсыахпыт!

 

0
0