Айылҕа харыстабыла Сүрүн

Ил Дархан Айсен Николаев Өлүөнэ өрүс күнүнэн эҕэрдэлээтэ

Ытыктабыллаах Сахам сирин дьоно! Саха Өрөспүүбүлүкэтин салалтатын уонна тус бэйэм ааппыттан Өлүөнэ өрүс күнүнэн эҕэрдэлиибин!

Улуу Өлүөнэ өрүспүт биһиэхэ, Саха сирин олохтоохторугар, туох да омуна суох тыыммытын салгыыр хорук тымырбыт буолар. Өрүспүт уутунан Дьокуускай куорат, атын үгүс бөһүөлэктэр хааччыллаллар. Өлүөнэ устун оттук, тутуу матырыйаалларын курдук тыын таһаҕастар тиэллэллэр. Өрүс суола баар буолан Арктика улуустарыгар таһаҕас тиийэр.

Өлүөнэ эбэбит – айылҕа киһи аймаҕы хатаҕалаан биэрбит бэлэҕэ. Байкал арҕаа арҕаһыттан саҕаланан Иркутскай уобалаһынан устан биһиги өрөспүүбүлүкэбитигэр тиийэр. Арктикаҕа тиийэригэр Алдан, Витим, Бүлүү, Өлүөхүмэ өрүстэр ууларын холбоон, Лаптевтар муораларыгар тиийэн Хотугу Муустаах байҕалга түһэр. Өлүөнэ устата 4400 килэмиэтири куоһарар, уутун иэнэ 2 490 000 кв. км тэҥнэһэр.

Өлүөнэ өрүс күнэ айылҕа харыстанар эбийиэгэр ураты болҕомтону тардарга, национальнай бренд быһыытынан өрө тутарга, экология туризмын сайыннарыыга ананан олохтоммута. Бу бэлиэ күҥҥэ Саха сирин үрдүнэн араас хабааннаах тэрээһиннэр ыытыллаллар.

Ол курдук, быйыл онлайн күрэстэр ыытыллыахтара: Өлүөнэ өрүс дьикти көстүүтэ” хаартысканан куонкурус, “Өлүөнэ – Сибиир күөх меридиана” викторина, “Сир үрдүгэр өрүстэр өлбөтүннэр!” лиэксийэ, Instagram-ҥа Өлүөнэ өрүс устун видео-экскурсия, “Кэрэ Өлүөнэ” куукуланан туруоруу уонна “Ыраас Өлүөнэ” челлендж.

Ону таһынан бу күҥҥэ Урбаан, эргиэн уонна туризм министиэристибэтэ үгэс буолбут субуотунньугу Табаҕа тумулугар ыытыаҕа, “Водоканал” тэрилтэ өрүс кытылын ыраастыаҕа.

Убаастабыллаах өрөспүүбүлүкэ олохтоохторо! Өлүөнэ өрүһү харыстыыр экология тэрээһиннэригэр көхтөөхтүк кыттаргытыгар ыҥырабын. Сылтан сыл маннык тэрээһиннэр элбээн иһиэхтэрэ. Биһиги кэлэр көлүөнэлэргэ кэрэ өрүспүтүн ыраас хаалларар ытык иэстээхпит. Өр сыллар тухары Өлүөнэ эбэбит оҕолорбутун, сиэннэрбитин, хос сиэннэрбитин ыраас уунан, өлгөм балыгынан хааччыйа турдун!

«Саха сирэ» хаһыат, edersaas.ru

Хаартыска: sakha.gov.ru

0
0