“Муус устар ортотуттан хоруона дьаҥынан ыалдьыбыт дьон ахсаана эбиллэ, хаһыс даҕаны нэдиэлэтин сууккаҕа сүүстэн тахсалыы киһи ыалдьа турар”, — диэн бүгүн Ил Дархан Айсен Николаев олохтоох тэлэбиисэринэн уонна араадьыйанан быһа сибээскэ тахсан, нэһилиэнньэҕэ туһаайыытын тиэртэ.
Хомойуох иһин, ыарыы чугуйбат, ону ааһан, мутацияланан иһэрин, өскөтүн эрдэ оҕолор, эдэр дьон ыалдьаллара бэлиэтэммэтэх буоллаҕына, билигин чаастатык ыалдьан эрэллэрин иһитиннэрдэ. Саастаах, хроническай ыарыылаах дьоҥҥо кутталлааҕын санатта. Ыарыыттан сылтаан олохтон барар дьон ахсаана эбиллэ турарын эттэ.
Эпидемиологическай балаһыанньа тыҥааһына хааччахтыыр миэрэлэри күүһүрдэргэ күһэйэрин, саҥа хааччахтары, сүбэлэри киллэрэр эрэйэрин бэлиэтээтэ. Ол курдук, бу күннэргэ үс ыйаахха илии баттаабытын, өрөспүүбүлүкэ иһигэр киин куораттан улуустарга, өрөспүүбүлүкэ тас өттүттэн дьон кэлиитэ-барыыта учуоттанарын ыйда.
“Кутталлаах ыарыыны көдьүүстээхтик утарсар туһугар биһиги бэлэм буолуохтаахпыт. Сүрүн сэбиргэлбит (оружие) – хоруона дьаҥын утары вакцина биһиэхэ баар. Бүгүҥҥү күҥҥэ өрөспүүбүлүкэҕэ 122 тыһыынча киһи быһыыны ылла. Ол эрээри, бу аҕыйах”, — диэн Ил Дархан бэлиэтээтэ.
Бүгүҥҥүттэн Дьокуускай куорат уонна Мэҥэ Хаҥалас улууһун олохтоохторугар маассабай быһыыны биэрии саҕаланна. Үлэ уонна өрөбүл күннэргэ пууннар сарсыарда 8 чаастан киэһэ 8 чааска диэри үлэлиэхтэрин, “Мои документы” офистарыгар уонна бааннарга саҥа пууннар аһыллыахтарын билиһиннэрдэ. Онон дьон Дьокуускайга уонна Мэҥэ Хаҥаласка барыллаан суруйтарыыны ааспакка, олорор сириттэн тутулуга суох, пааспардаах, СНИЛСтаах, полистаах эрэ тиийэн быһыы ылыан сөбүн чопчулаата.
“Өрөспүүбүлүкэ бары мэдиссиинэтин сулууспалара, лабораториялара, суһал ыстааптара кыахтара баарынан үлэлииллэр. Кинилэр үлэлэрэ халтай хаалбатын, түмүктээх буоларын туһугар норуот өйөбүлэ эрэйиллэр. Онто суох дьаҥы кыайар кыаллыбат. Бэйэҕит уонна чугас дьоҥҥут доруобуйатыгар харыстабыллаахтык сыһыаннаһыҥ.
Биһиги, Арассыыйа олохтоохторо бэйэбит дойдубутугар оҥоһуллубут вакцинаны судургутук ылар улахан кыахтаахпыт. Бу кыаҕы туһанар ирдэнэр. Биһиги сүрүн уопсай сорукпут – быһыыны маассабайдык ылыы. Ыарыыны кыайар туһугар биир сомоҕо буолуоҕуҥ!”, — диэн Саха сирин олохтоохторугар туһаайан эттэ.
Людмила ПОПОВА, “Саха сирэ” хаһыат, edersaas.ru