Ил Дархан Айсен Николаев уонна Арассыыйаҕа Япония боломуочуйалаах посола Тоехиса Кодзуки көрсөн, бииргэ үлэлэһии бырайыактарын кэпсэттилэр.
Кодзуки Дьокуускайга Айсен Николаев ыҥырыытынан III Хотугу пуорумҥа кытта кэлбитэ. Дьоппуоннар килиимэт, ирбэт тоҥ уларыйыытын боппуруостарыгар чинчийии ыытар былааннаахтар. Дьоппуон хампаанньалара өрөспүүбүлүкэҕэ улахан инвестиционнай бырайыактарга кыттыахтарын туһунан кэпсэттилэр. Ол онно бөҕү-саҕы хос оҥорон таһаарар станцияны тутуу, бырамыысыланнас, энэргиэтикэ бырайыактара бааллар.
Посол “Саюри” кыһыннары-сайыннары үлэлиир тэпилииссэҕэ сырытта. Сотору кэминэн 1,2 гектаар иэннээх сиргэ үһүс блок тутуллуохтаах. Манна дьоппуон хампаанньалара эмиэ кыттыгастаахтар.
Бу иннинэ Илиҥҥи экэнэмиичэскэй пуорумҥа Айсен Николаев дьоппуон партнердарын кытары үлэлэһии – Саха сирин тас дойдулары кытары үлэлэһиитин биир сүрүн хайысхата диэн этэн турар. Холобур, 2018 сыллаахха Тиксиигэ “Мицуи” корпорация “Комаихалтек” уонна “НЭДО” хампаанньалары кытары тыал күүһүнэн барар, эниэргийэни оҥорор тэрили туруорбуттара.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru