Ил Дархан Айсен Николаев бүгүн социальнай ситимнэринэн быһа сибээс кэмигэр ыам ыйын 12 күнүттэн өрөспүүбүлүкэҕэ кыралаан “сымнатыыны” киллэриэхпит диэтэ.
— Ыам ыйын 12 күнүттэн хааччахтыыр миэрэлэри сыыйа сымнатыахпыт. Бу күннэргэ илии баттыаҕым. Кырдьыгын эттэххэ, эрдэтээҥҥи ыйаахтан улахан уратыта суох буолуоҕа. Ол эбэтэр, Саха сирин түөрт чааска араарабыт: Арктика уонна ыраах сытар нэһилиэнньэлээх пууннар; тыа сирин нэһилиэктэрэ; улахан муниципальнай тэриллиилэр (Дьокуускай, Жатай, Мииринэй, Нерюнгри, Алдан, Ленскэй); харантыыҥҥа барбыт сирдэр (Алдан уонна Ленинскэй бөһүөлэк, Чайыҥдатааҕы ньиэп-гаас хостонор сирэ, баахтанан бөһүөлэк (Сунтаар).
Итиннэ барытыгар хааччахтааһын араас. Сымнатыы эмиэ тус-туспа барыаҕа. Арктика уонна үгүс тыа сирин нэһилиэктэригэр улахан куттал суох, култуура, спорт, атын даҕаны тэрээһиннэртэн ураты хааччахтааһыны уһуларга бэлэммит. Оттон улахан муниципальнай тэриллиилэргэ ити кыаллыбат. Роспотребнадзор быһаарарынан, кырата биир нэдиэлэ устата ыалдьыбыт киһи ахсаана 2 бырыһыантан элбэҕэ суох буоллаҕына эрэ дьиэҕэ олоруу уһуллар кыахтаах. Оттон Дьокуускай куоракка күннэтэ 13-14 бырыһыан эбиллэ турар, — диэн иһитиннэрдэ.
Онон улахан муниципальнай тэриллиилэр олохтоохторо кырата 2 нэдиэлэ өссө дьиэҕэ олоробут.
Арай, Алдаҥҥа кытаанах харантыыны биллэрэн уонна олохтоохтор тутуһан, ыалдьыбыт дьон куоракка буолбакка, обсерваторга бэлиэтэнэллэр диэн эттэ. Ыам ыйын 10 күнүгэр диэри Алдаҥҥа дьон ыалдьыбатаҕына харантыыны уһулуохпут диэтэ.
Людмила ПОПОВА, edersaas.ru