Өрөспүүбүлүкэ олохтоохторуттан киирэр боппуруостары суһаллык быһаарар наадаттан Ил Дархан Айсен Николаев видеоконференцсибээс эрэсииминэн гражданнары кытта көрүстэ.
Биир бастакынан М.К. Аммосов аатынан ХИФУ инклюзивнай үөрэхтээһини сайыннарыы Хотугулуу-Илиҥҥи научнай-инновационнай киинин дириэктэрэ Пантелеймон Егоров Ил Дархаҥҥа сибээскэ таҕыста. Кини 2030 сылга диэри СӨ инклюзивнай үөрэхтээһинин государственнай бырагырааматын ырытан оҥорууга уонна бигэргэтиигэ сыһыаннаах хас да ыйытыыны, Саха тылын алпабыытын Брайлевскай биэрсийэтин стандартка киллэрии, ону тэҥэ коррекционнай оскуолаларга саха тылын уонна литературатын уруогун чаастарын булгуччулаах биридимиэт быһыытынан үөрэх былааныгар киллэрэр туһунан эттэ.
Ил Дархан инклюзивнай үөрэҕи сайыннарыы государственнай бырагырааматын ырытан оҥоруу суолталааҕын бэлиэтээтэ. СӨ үөрэҕин уонна наукатын министиэристибэтигэр госбырагырааманы оҥорон түмүктээн, бу дьыл алтынньы 1 күнүгэр диэри эрэгийиэннээҕи бырабыыталыстыба көрүүтүгэр киллэрэргэ сорудахтаата.
Саха тылын Брайлевскай биэрсийэтин стандарт быһыытынан ылыныы боппуруоһун Айсен Николаев туһааннаах министиэристибэҕэ Тиэхиньиичэскэй салайыы уонна метрология федеральнай агентствотын («Росстандарт») кытары бигэргэтэллэригэр уонна Саха тылын шириибин стандартка киллэрэллэригэр соруйда.
Үһүс ыйытыыга Айсен Сергеевич оҕолор уонна төрөппүттэр төрөөбүт тылынан үөрэниигэ наадыйар буоллахтарына, эрэгийиэннээҕи былаас оннук кыаҕы биэриэхтээҕин туһунан эттэ.«Коррекционнай оскуолаларга сүрүннээн тыа сирин оҕолоро үөрэнэллэрин учуоттаан, төрөөбүт тылынан үөрэниэхтээхтэр дии саныыбын», — диэн Ил Дархан тоһоҕолоон бэлиэтээтэ.
Саҥа үөрэх дьылыттан Үөрэх уонна наука министиэристибэтин боротокуоллаах быһаарыытынан Көрбөт уонна мөлтөхтүк көрөр оҕолор өрөспүүбүлүкэтээҕи интернат оскуолаларын үөрэҕин бырагырааматыгар саха тылын уонна литературатын биридимиэтин киллэриэхтэрэ.
Дьокуускай куорат олохтооҕо Иннокентий Тимофеев коронавирус дьаҥынан ыалдьан үтүөрүү кэнниттэн, доруобуйаны чөлүгэр түһэриини барарыгар көмөлөһөрүгэр Ил Дархантан көрдөстө: «Былырыын алтынньыга коронавирус дьаҥынан ыалдьыбытым, быраастар, медсиэстэрэлэр көмөлөрүнэн эмтэммитим. Ыарыы кэнниттэн уопсай доруобуйаны чөлүгэр түһэрэргэ Рихард Зорге аатынан уулуссаҕа турар республикатааҕы социальнай- чэбдигирдэр кииҥҥэ реабилитацияны ааһыахпын баҕарабын«, — диэн кыһалҕатын иһитиннэрдэ.
Ил Дархан Иннокентий Тимофеевка кытаанах доруобуйаны баҕарда уонна Доруобуйа харыстабылын, ону кытары Үлэ уонна Социальнай сайдыы министиэристибэлэрин аадырыстарыгар туһааннаах сорудах толоруллуо диэн эрэннэрдэ.
Өрөспүүбүлүкэ олохтоохторун кытары биирдиилээн быһа сибээс нөҥүө Черскэй бөһүөлэгин олохтооҕо коронавируһу утары быһыы вакцинатын Аллараа Халыма оройуонугар тиэрдии туһунан боппуруоһа көрүлүннэ.
Доруобуйа харыстабылын миниистирэ Елена Борисова иһитиннэрбитинэн, Аллараа Халыма оройуонугар 1200 доза вакцина түҥэтиллибит. Бүтэһик баартыйа 200 доза ыам ыйын 15 күнүгэр оройуоҥҥа тиэрдилиннэ. Билигин оройуон үрдүнэн вакцинаны ылар уочаракка 138 киһи суруйтарда. Субуотаҕа, ыам ыйын 29 күнүгэр, сөмөлүөтүнэн эбии 450 доза вакцина тиксэриллиэҕэ. Маркировка кэнниттэн оройуон олохтоохторо быһыыны ылыахтарын сөп.
«Федеральнай оперативнай штаб быһаарыытынан өрөспүүбүлүкэҕэ балачча элбэх доза вакцина кэлэ турар. Онон вакцинаҕа наадыйыы баар оройуоннара сөптөөх вакцинанан хааччыллыахтара», — диэтэ Ил Дархан Айсен Николаев.
edersaas.ru