Ил Дархан Уус Маайаҕа коронавируһу бохсууга тэрээһиннээх үлэ ыытыллыбытын бэлиэтээтэ

Оройуон баһылыга уонна олохтоох суһал ыстаап салайааччыта Александр Антипин улууска коронавируһунан быһыыны-майгыны билиһиннэрдэ. Ол курдук, пандемия саҕаланыаҕыттан оройуоҥҥа COVID-19 дьаҥар барыта 232 киһи, ол иһигэр 28 оҕо ыалдьыбыта бэлиэтэммит.  Бүгүҥҥү күҥҥэ алта киһи эмтэнэр, 226 киһи үтүөрбүт. Маны сэргэ кини: «Оройуоҥҥа 200 доза вакцина кэллэ. Ону харайар анал сирдэр бааллар, быһыыны оҥорор пуун Уус Маайа бөһүөлэгин поликлиникатыгар тэриллибитэ. Мобильнай пуун Элдьикээҥҥэ амбулатория, оскуола, оҕо саадын уонна дьаһалта үлэһиттэригэр быһыыны оҥорор«, — диэтэ.

Айсен Николаев оройуоннааҕы суһал ыстаап уонна мэдиссиинэ үлэһиттэрин тэрийбит үлэлэрин үрдүктүк сыаналаата. «Оройуон баһылыга Александр Антипин салайааччылаах суһал ыстаап уонна мэдиссиинэ үлэһиттэрин тэрээһиннээх үчүгэй үлэлэрин бэлиэтиибин. Эһиги дьон-сэргэ олоҕун араҥаччылыырга, быыһыырга уонна дьаҥ тарҕаныытын бохсорго олус элбэх үлэни ыыттыгыт«, — диэн бэлиэтээтэ Ил Дархан.

Айсен Николаев Уус Маайа улууһугар доруобуйа харыстабылын үлэтэ сайдарыгар өрөспүүбүлүкэ салалтата ураты болҕомтотун ууруо диэн эрэннэрдэ. Маныаха 2023 сылга диэри оройуон киинигэр балыыһа комплекса, салгыы Солнечнай бөһүөлэгэр амбулатория тутуллуохтаах.

Доруобуйа харыстабылыгар өр сыллаах үтүө суобастаах үлэлэрин иһин СӨ Ил Дарханын Грамотатынан улуус аптекатыгар фармацебынан үлэлиир Александра Ефимова, «Гражданскай килбиэн» бэлиэнэн оройуоннааҕы балыыһа терапевтическай отделениетын сэбиэдиссэйэ Галина Павлова наҕараадаланнылар.