Ил Дархан Уус Маайаҕа элбэх оҕолоох ыалга сырытта

Ааптар: 
Бөлөххө киир:

СӨ Ил Дархана Айсен Николаев бүгүн Уус Маайаҕа үлэтинэн тиийэ сылдьан, элбэх оҕолоох Игорь уонна Полина Ворониннары көрүстэ.

Ворониннар биэстэн уонна онтон элбэх оҕолоох дьиэ кэргэҥҥэ биир кэмнээх социальнай төлөбүр көмөтүнэн, соторутааҕыта, СӨ архитектураҕа уонна тутууга министиэристибэтин сүнньүнэн учаастактаах кыбартыыраны атыыластылар. Кинилэр бу иннинэ, киинтэн ыраах, оптуобуһунан эрэ айаннаан кэлэр Геологтар түөлбэлэригэр олорбуттара. Оттон билигин бөһүөлэк киинигэр кэллилэр.

Игорь Владимирович уонна Полина Витальевна олорор усулуобуйаны тупсарыыга көмө иһин СӨ Ил Дарханыгар махтаннылар. Саҥа дьиэлэрин үөрэ-көтө көрдөрдүлэр, үлэлэрин-хамнастарын сырдаттылар. Дьиэ кэргэн бэйэлэрэ хаһаайыстыбалаахтар, оҕуруоттаахтар.

Айсен Сергеевич дьиэ кэргэн сыаннаһыгар харыстабыллаах сыһыаннаахтарыгар махтанна. Оҕолор үчүгэйдик үөрэнэллэригэр баҕарда уонна дьиэ кэргэҥҥэ ноутбук туттарда.

Дьиэ кэргэн аҕа баһылыга доруобуйатынан биэнсийэҕэ тахсыар диэри Уус Маайатааҕы уот ыстаансыйатыгар (ДЭС) үлэлээбит. Билигин оҕо-ыччат спортивнай оскуолатыгар (ДЮСШ) харабыллыыр. Полина Витальевна нэһилиэнньэҕэ социальнай көмүскэл управлениетыгар дьиэ кэргэҥҥэ уонна оҕолорго социальнай көмө киинигэр дьуһуурунайдыыр.

Игорь Владимирович уонна Полина Витальевна биир уоллаахтар, түөрт кыыстаахтар. Уоллара Сергей Дьокуускай куоракка олорор, улахан кыыс Анастасия коммунальнай-тутуу техникумун бүтэрэн, кэтэхтэн үрдүк үөрэх кыһатыгар үөрэнэр, бырайыактааһыҥҥа үлэлэһэр тутуу фирматыгар үлэлиир. Үс кыыс оскуола үөрэнээччилэрэ. Галина — 11-с, Юля – 9-с, Екатерина – 7-с кылааска үөрэнэллэр. Кыргыттар Ил Дархан Айсен Николаевка тугунан үлүһүйэллэрин, спорт уонна музыка туһунан кэпсээбиттэр. Үөрэх кыһаларыгар, ускуустуба оскуолатыгар педагогтар тиийбэт буоланнар, куруһуоктар аҕыйахтарын эппиттэр. Маныаха Ил Дархан оройуоҥҥа каадыр боппуруоһун быһаарыыга сорудах бэриллиэҕэр эрэннэрбит.

СӨ Ил Дархан уонна Бырабыыталыстыба пресс-сулууспата

Андрей Сорокин (СИА) хаартыскаҕа түһэриилэрэ

+1
0
+1
0
+1
0
+1
0
+1
0
+1
0
+1
0