Ил Дархан улуустар баһылыктара нэһилиэнньэҕэ иһитиннэриини суһаллык тиэрдэн иһэллэригэр соруйда

Ааптар: Эдэр Саас

Бөлөххө киир:

СӨ Ил Дархана Айсен Николаев улуустар баһылыктарын нэһилиэнньэҕэ ойуур баһаардарын умуруоруу туһунан суһаллык иһитиннэрэн иһэллэригэр соруйда.

Өрөспүүбүлүкэҕэ ойуур баһаардарынан быһыы-майгы билигин да уустук. Нэдиэлэ алтыс күнүгэр, от ыйын 24 күнүгэр, Саха сирин киин оройуоннарыгар сөҥүү түһэн, сорох улуустарга балаһыанньа бигэтийдэ эрээри, кэнники күннэргэ тыалыран, 18 саҥа ойуур баһаара турбута бэлиэтэнэр. Бу туһунан бүгүн, от ыйын 26 күнүгэр, өрөспүүбүлүкэтээҕи суһал ыстаап уочараттаах мунньаҕар Ил Дархан Айсен Николаев эттэ.

Ааспыт хонукка өрөспүүбүлүкэ сиригэр-уотугар 45 ойуур баһаара умуруоруллубут. Бүгүн сарсыарда 08.00 чаастааҕы иһитиннэриинэн, өрөспүүбүлүкэ сиригэр-уотугар 154 ойуур баһаара баара бэлиэтэммитэ. Бу ааспыт нэдиэлэни кытары тэҥнээтэххэ биллэ аччаабыт, оттон ол иннинээҕи көрдөрүүттэн 2,5 төгүл кэриэтэ кыччаабыт.

Бүгүҥҥү күн туругунан 15 оройуоҥҥа 52 ойуур баһаарын умуруорууга үлэ ыытыллар. Уоту утары үлэҕэ икки тыһыынчаттан тахса киһи, 270 тиэхиньикэ үлэлиир. Нэһилиэнньэлээх пууннарга куттал суоһаабат. Ол да буоллар, Горнай улууһугар Маҕарас, Өрт, Күөрэлээх уонна Үөһээ Бүлүү улууһугар Кырыкый таһыгар баар ойуур баһаардара СӨ суһал ыстаабын ураты хонтуруолугар тутуллаллар. Бу сирдэргэ ойуур баһаардарыгар күүһүрдүллүбүт бөлөхтөр үлэлииллэр.

Айсен Николаев ойуур баһаардарынан нэһилиэнньэни хааччахтааһын боппуруоһун улуус баһылыктара миэстэтигэр хонтуруоллуу олороллорун бэлиэтээтэ. Кини иһитиннэриини хайдах баарынан суһаллык уонна аһаҕастык нэһилиэнньэҕэ тиэрдэн иһэри наадалааҕынан аахта. Социальнай ситимнэринэн, мессенджердэринэн дьону долгутар сымыйа иһитиннэриилэр сотору-сотору тарҕаналлар.

Сорох улуустар ойуур баһаардарын туһунан уонна олору умуруорууга ылыллар миэрэлэр тустарынан нэһилиэнньэҕэ суһаллык тарҕаталлар. Итиннэ нэһилиэнньэҕэ иһитиннэриини хайдах баарынан кистээбэккэ тиэрдэр уонна ойуур баһаардарын умуруорууга үлэни тиһиктээхтик тэрийэн иһэр Сунтаар улууһа холобур буолла. Маннык аһаҕас бэлиитикэни атын муниципальнай тэриллиилэр ыыталлара эмиэ наадата ыйылынна.

Горнай улууһугар билиҥҥи туругунан 16 ойуур баһаара бэлиэтэнэриттэн уон биирин умуруорууга үлэ ыытыллар. Кэнники хонук устатыгар оройуоҥҥа икки ойуур баһаара умуруорулунна: Маҕаны нэһилиэгин сиригэр-уотугар 57 №-дээх уонна Кировскай нэһилиэк сиригэр 46 №-дээх ойуур баһаардара. Солоҕон нэһилиэгин сиригэр-уотугар 52 №-дээх ойуур уота бохсуллубут.

Билиҥҥи туругунан ойуур баһаардарын умуруорууга 342 киһи үлэлиир: Авиалесоохрана 174 үлэһитэ, Якутлесресурс – 54, Горнай улууһун ойуур хаһаайыстыбатын – 11, олохтоох нэһилиэнньэттэн 104 киһи үлэлииллэр. 73 массыынаны, тыраахтары туһаналлар.

Горнай улууһугар ардахөрөбүллэргэ Солоҕоҥҥо, Мытаахха, Октябрьскайга, Одунуга түстэ уонна Маалтааны сорох сирин таарыйда. Атамайга ардах соҕуруу өттүнэн ааста.

Бүгүн Горнай улууһугар бары буола турар баһаардары үөһээттэн эргийэ көтөн көрөллөрө былааннанар уонна ол түмүгүнэн сорох уоту бохсору, салгыы тугу гынары былаанныахтара. Бу туһунан улуус баһылыга Никита Андреев иһитиннэрдэ.

СӨ Ил Дархана сөҥүү түһэн, ол иһигэр ардаҕы ыҥыран түһэриинэн кылгас кэмҥэ тыын ыларга, кэккэ оройуоннарга умайа турар ойуур баһаардарын эргийиигэ, бохсууга үлэни күүһүрдэргэ эттэ. Маныаха ойуур баһаардарын умуруорууга сөптөөх дьаһайар үлэ Сунтаар уонна Хаҥалас улуустарыгар оҥоһуллубутун, онно элбэх уот бохсуллубутун уонна умулларыллыбытын ыйда.

«Атырдьах ыйа кураан буолара күүтүллэр, онон холкутуйар, налыйар табыллыбат. Ойуур баһаара эмискэ улааппатын туһугар, үлэни атырдьах ыйын үс бастакы нэдиэлэтигэр өссө күүһүрдэрбит наада. Былырыын өрөспүүбүлүкэҕэ ойуур баһаардара от ыйын бүтүүтүгэр уонна атырдьах ыйын бастакы дэкээдэтигэр улаата сылдьыбыттара бэлиэтэммитэ. Былырыыҥҥы быһыы-майгы хатыланыа суохтаах. Ол туһуттан ойуур баһаардарын аҕыйатарга, умуруорарга күүстээх үлэ барыахтаах», — диэн Ил Дархан эттэ.

Андрей Сорокин (СИА) хаартыскаҕа түһэриитэ