Бүгүн, сэтинньи 10 күнүгэр, өрөспүүбүлүкэ Ил Дархана Айсен Николаев улуус уонна куорат уокуруктарын баһылыктарын кытта мунньахтаата.
Мунньахха коронавирус дьаҥын утары охсуһууга саҥа соруктары туруорда. Айсен Сергеевич бэлиэтииринэн, сэтинньи 5 күнүттэн күн ахсын 200-түү киһи дьаҥҥа сутуллар. Алтынньы бүтэһик дэкээдэтин түмүгүнэн, Саха сирэ ыарыы тарҕаныытыгар Арассыыйа Федерациятын субъектарыгар 14-с миэстэҕэ турар. Ааспыт нэдиэлэҕэ уопсайа 40 тыһыынча анаалыс оҥоһуллубут.
Билигин Дьокуускайга, Алдаҥҥа, Анаабырга, Үөһээ Бүлүүгэ, Бүлүүгэ, Нерюнгрига, Мииринэйгэ, Өймөкөөҥҥө, Уус Алдаҥҥа уонна Чурапчыга балаһыанньа уустугурбутун бэлиэтээтэ. Ону сэргэ, Ньурбаҕа уонна Өлүөхүмэҕэ интэринээт дьиэлэргэ ыарыы эмискэ өрө туран балаһыанньа ыараабытын иһитиннэрдэ. Өрөспүүбүлүкэҕэ ыараханнык ыалдьааччы ахсаана элбээн, реанимацияҕа 120 киһи, онтон 29 киһи ИВЛ аппараакка холбонон сытарын ыйда. Балыыһаларга куойка миэстэтэ 82% толорутун эттэ. Ленскэйгэ, Мэҥэ Хаҥаласка, Мииринэйгэ, Муомаҕа, Ньурбаҕа, Тааттаҕа, Хаҥаласка балыыһалар толоруларын эттэ.
Ил Дархан улуус баһылыктара кылаабынай быраастары кытта өрүү сибээстэһэ олороллоругар уонна Сыана кэмитиэтин, Росздравнадзор тэрилтэлэрин кытта аптекаларга эмп сыанатын хонтуруоллууру дьаһайда. Ил Дархан аадырыһыгар өрөспүүбүлүкэ олохтоохторуттан элбэх үҥсүү киирэ турарын бэлиэтээтэ.
Мунньах кэмигэр Горнай улууһун баһылыга Никита Андреев улууһугар 69 киһи ыалдьыбытын, онтон 26 киһи балыыһаҕа эмтэнэрин иһитиннэрдэ. Биир киһи аппараакка холбоммут.
Таатта улууһун баһылыга Михаил Соров улууска 99 киһи ыалдьыбытын, онтон 24 киһи балыыһаҕа эмтэнэрин дакылааттаабыт.
Онон суһал мунньахха этиллибит Ил Дархан дьаһалын тутуһуу учуоттаннаҕына, бары усулуобуйа кэмигэр тэрилиннэҕинэ, дьаҥ өрө туруута арыый намтыа этэ.
Ульяна Захарова, edersaas.ru