Ил Дархан улуус баһылыктарын кытта мунньахха суолталаах боппуруостары ырытта
![](https://edersaas.ru/wp-content/uploads/2020/04/IMG_0215.jpg)
Бүгүн, муус устар 17 күнүгэр, Ил Дархан Айсен Николаев улуус баһылыктарын кытта видео-сибээһинэн мунньах ыытта.
edersaas.ru
Онно Аҕа баһылык маннык боппуруостары тоһоҕолоон бэлиэтээтэ:
✅ Cыстыганнаах дьаҥынан сибээстээн балаһыанньа кытаатта: 47 киһи коронавируһунан ыарыйда (15 киһи үтүөрдэ). 32 киһи эмтэнэр. Ыалдьыбыт дьонтон 14 киһи — Алдаҥҥа, 11 киһи — Дьокуускайга (онтон 2 киһи — Горнай улууһуттан, 1 киһи — Бүлүү улууһа ), 5 киһи — Ленскэй к., биирдии киһи Мииринэй уонна Бүлүү куораттарыгар эмтэнэллэр.
✅ Өрөспүүбүлүкэҕэ коронавирус дьаҥыгар сутуллубут киһи ахсаана элбээн иһэринэн, улуустарга ыарыыны бохсор үлэни ыытыыны күүһүрдэр сорук турда.
✅ Сүрүн болҕомто — атын эрэгийиэнтэн уонна кыраныысса таһыттан кэлбит дьону туспа олордон, ханна да тахсыбаттарын ирдиэххэ. Элбэх киһи ыалдьан эрэринэн сибээстээн, обсерватордар ахсааннарын элбэтэргэ .
✅ Бу өрөбүлгэ Пасха бэлиэтэнэринэн сибээстээн, Алдаҥҥа уонна бу улуус Ленинскэй бөһүөлэгэр Таҥара дьиэлэригэр сулууспа дьоно суох барыахтаах. Эппиэттээх сулууспалаахтар бэйэлэрэ эрэ ыытыахтаахтар. Атын оройуоннарга Роспотребнадзор кылаабынай бырааһын ирдэбиллэрэ кытаанахтык тутуһуллара наада.
✅ Ордук улахан болҕомто муус устар 28 күнүгэр түбэһэр «Төрөппүт күнүгэр» («Родительский день») ууруллуохтаах . Сыстыганнаах коронавирус дьону сутуйбатын инниттэн, кылабыылаһарга дьон сылдьыытын аҕыйатарга сэрэтии үлэ дойду үрдүнэн бара турар
✅ Бэҕэһээҥҥиттэн, муус устар 16 күнүттэн, ньиэби хостуур Чайыҥдаҕа харантыын биллэрилиннэ. Онно киирии-тахсыы кытаанахтык бобулунна.
✅ Вице-премьер Ольга Балабкина Кырдьаҕастар олорор дьиэлэрэ, детдомнар, реабилитациялыыр кииннэр баар улуустарыгар онно үлэлиир үлэһиттэр, кырдьаҕастар, оҕолор, инбэлииттэр доруобуйаларын туругун сотору-сотору кэтээн көрөллөрүгэр сорудахтаата. Медицинскэй тэрилтэлэр, элбэх кыбартыыралаах дьиэлэр, оҕо былаһааккалара чаастатык дезинфекцияны бараллара наада.
… Селекторнай мунньахха Алдан, Кэбээйи, Ленскэй, Мэҥэ Хаҥалас уонна Мииринэй улуустарын баһылыктара сыстыганнаах дьаҥы бохсууга туох үлэни ыыталларын туһунан иһитиннэрдилэр.
Елена ПОТОЦКАЯ, «Саха сирэ» хаһыат, edesrsaas.ru
Хаартыска — Андрей Сорокин, СИА.