Ил Дархан «Тыа сирин кэлимник сайыннарыы» бырагырааматын толоруу болдьохторун тутуһарга ыҥырда
Саха сирэ сыл аайы «Тыа сирин кэлимник сайыннарыы» федеральнай бырагыраамаҕа көхтөөх кыттыыны ылар. 2021 сылга бу бырагыраама үбүлээһинэ 2 млрд солкуобайга тиийэ үрдээбитэ, итинтэн 1,8 млрд солк. федеральнай бүддьүөттэн көрүллүбүтэ.
«Тыа сирин кэлимник сайыннарыы» судаарыстыбыннай бырагыраама олоххо киириитин хаамыытын туһунан сэтинньи 3 күнүгэр, Саха сирин баһылыга Айсен Николаевы кыттыылаах сүбэ мунньахха көрүлүннэ.
“Тыа сирин кэлимник сайыннарыы бырагыраама биһиги сэлиэнньэлэрбитигэр улахан туһаны аҕалар. Бу бырагыраама өҥөтүнэн тыа сиригэр социальнай эбийиэктэр, олорор дьиэ-уот, суол-иис тутуллар, дьиэ-уот коммунальнай инфраструктурата тэриллэр, күөх төлөнүнэн уонна уунан хааччыйыы боппуруостара быһаарыллаллар. Бырагыраама дьаһалларын олоххо киллэрии өрөспүүбүлүкэ тыа сиригэр олоҕун хаачыстыбатын үрдэтиигэ улахан суолталаах, онон судаарыстыбыннай бырагыраамаҕа былааннаммыт үлэлэри киллэрии болдьохторун тутуһууну кытаанахтык кэтээн көрүөх тустаахпыт” диэн Ил Дархан тоһоҕолоон эттэ.
Бу бырагыраама тыа сиригэр олох-дьаһах бары салааларын хабар. Саха сиригэр бырагырааманы олоххо киллэрии тоҕус хайысханан барар. Билиҥҥи туругунан өрөспүүбүлүкэ үрдүнэн бырагыраамаҕа салаллан кэлбит үбү-харчыны баһылааһын уонна дьаһаллары толоруу сорох хайысхаларга 100% тэҥнэһэр.
Ол курдук, быйыл тыа сиригэр олорор 20 киһи бу бырагыраама чэрчитинэн дьиэ атыылаһыыга социальнай төлөбүрдэри ыллылар. Мэҥэ Хаҥалас улууһун Бүтэйдээх сэлиэнньэтигэр 4 км. усталаах гаас ситимэ тардылынна. Сунтаар улууһун Агдары уонна Кэбээйи улууһун Лүксүгүн сэлиэнньэлэригэр уу ситимн турбалара киллэрилиннилэр.
Бырагыраама маны сэргэ оскуолалары, оҕо уһуйааннарын, биэссэр-акушер пууннарын, спортивнай-чэбдигирдэр тутуулары, олорор түөлбэлэри комплекснай тутууну, социальнай тэрилтэлэргэ хапытаалынай өрөмүөнү ыытыыны, култуура уонна үөрэх эбийиэктэригэр тырааныспары ылыыны үбүлүүр.
Ол гынан баран үс эбийиэги үлэҕэ киллэрии болдьоҕо тардылынна. Бу Уһун уонна Күбэйиндэ нэһилиэктэргэ 150 миэстэлээх оскуола уонна 50 миэстэлээх уһуйаан тутуута, «Лена» федеральнай суолталаах суол I Орочоон уонна Лебединай икки ардынан учаастагын өрөмүөнэ. Бу эбийиэктэр 2022 сыл бастакы кыбаарталыгар үлэҕэ киирэллэрэ былааннанар.
Хаартыска sakha.gov.ru