Ил Дархан Айсен Николаев Санкт-Петербурдааҕы экэнэмиичэскэй пуорумҥа тутууга уонна хомунаалынай хаһаайыстыбаҕа анаммыт сессияҕа хаарбах туруктаах дьиэлэртэн көһөрүү бырагырааматын эбии үбүлүүр туһунан туруоруста.
— Саха сиригэр чааһынай дьиэни туттуу элбээбитин көрөбүт, онон былырыыҥҥы былааммытын ситтибит: 570 тыһыынчаттан тахса кв.м. тутулунна. Бу манна хаарбах дьиэттэн көһөрүү бырагыраамата эмиэ улахан оруоллаах. Эрэгийиэннэр ылыммыт эбэһээтэлистибэлэрин болдьоҕор толороллорун курдук, көмөлөһүөххэ наада. Бу бырагыраамаҕа эбии үбүлээһин ирдэнэр, — диэн кини эттэ.
Саха сиригэр «Жилье и городская среда» национальнай бырайыак «Обеспечение устойчивого сокращения непригодного для проживания жилищного фонда» диэн федеральнай бырайыага үлэлии турар. 2025 сыл бүтүөр диэри судаарыстыбаннай көмөнү туһанан, 61 тыһыынчаттан тахса киһини көһөрөн, 1,1 мөл.кв.м. иэннээх хаарбах дьиэни көтүрэр сорук турар.
Кэнники 3 сыл иһигэр номнуо 18 тыһыынча киһи хаарбах дьиэттэн көһөрүлүннэ, 130 элбэх кыбартыыралаах дьиэ тутулунна. Билигин 88 элбэх кыбартыыралаах дьиэ тутулла турар, бу сыл бүтүөр диэри 460 тыһ.кв.м. иэннээх хаарбах дьиэ көтүрүллүөхтээх.
Айсен Николаев эппитинэн, биир кыһалҕа күөрэйэн, мэһэйдэри үөскэппит – тутуу матырыйаала, тутуу сыаната үрдээн хаалбыт.
— Бу бырагырааманан суоттанарбытыгар, 1 кв.м. сыаната ортотунан 77 тыһыынча солкуобай этэ, оттон билигин 1 кв.м. сыаната кырата 106 тыһыынча солкуобай буолла. Онон бырагырааманы бүтэрэн, ылыммыт эбэһээтэлистибэлэри толорорго үп-харчы тиийбэт. Бу кыһалҕа атын эрэгийиэннэри эмиэ таарыйар, — диэн кини эттэ.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru.