Сүрүн Уопсастыба

Ил Дархан: «Тумуулаабыт дьон эмиэ изоляцияҕа олоруохтаахтар»

Ил Дархан Айсен Николаев федеральнай “Россия24” ханаалга быһа эпииргэ тахсан, өрөспүүбүлүкэҕэ эпидемиологическай балаһыанньа туһунан интервью биэрдэ.

— Айсен Сергеевич, аҕыйах чаас анараа өттүгэр биллибитинэн, Саха сиригэр бүддьүөт үлэһиттэрин уонна устудьуоннары дьиэттэн олорон үлэлиир, үөрэнэр эрэсиимнэрэ киирдэ. Ол туһунан сиһилии кэпсиэҥ дуо?

— Саас буолбутун курдук, эргиэн дьиэлэрин, эрэстэрээннэри, кафелары, атын да тэрилтэлэри, уопсастыбаннай тырааныспары саппакка эрэ, коронавируснай инфекция тарҕаныытын тохтотор, аҕыйатар соруктаахпыт. Мин санаабар, харыстанар миэрэлэри тутустахпытына, ити кыаллар дьыала.

Билигин миэрэлэри кэспит тэрилтэлэр иккистээн тутулуннахтарына, сабыллаллар. Маасканы кэтии эрэсиимин, миэрэлэри тутуһууну кытаанахтык ирдээн, хонтуруоллаан эрэбит, ол иһигэр, холобур, оптуобуска мааската суох сылдьар киһи административнай эппиэтинэскэ тардыллар.

Бүддьүөт тэрилтэлэрин үлэһиттэрин 50%-гар тиийэ дьиэттэн олорон үлэлиир эрэсиимнэрэ киирдэ. Атын тэрилтэлэргэ үлэһиттэрин 30%-на буолуон сөп. Биллэн турар, бу оҥорон таһаарыы, күнүстэри-түүннэри үлэлиир, о.д.а. тэрилтэлэри таарыйбат.

Хотугулуу-Илиҥҥи федеральнай университекка 1-кы куурус устудьуоннара эрэ үөрэнэ сылдьыбыттара, атыттар дьиэлэриттэн олорон үөрэммиттэрэ. 1-кы куурус 3300 устудьуонуттан 130 киһи ыалдьыбыта биллибитэ, ол иһин барыларын тэйиччиттэн үөрэниигэ көһөрдүбүт.

Оскуола оҕолорун тэйиччиттэн үөрэниигэ көһөрөргө быһаарыныыны билиҥҥитэ ылыммаппыт, тоҕо диэтэр, 150 тыһыынча үөрэнээччиттэн 331 оҕо ыалдьыбыт.

Ону тэҥэ, тумуулаабыт уонна кинилэрдиин ыкса алтыспыт дьон эмиэ изоляцияҕа олорон эмтэнэллэрэ наадатын туһунан уураахха бүгүн илии баттыаҕым. Тоҕо диэтэр, ырытан көрүүбүт түмүгэр, тумуулаабыт, кирииптээбит дьон 30%-ра коронавирустаах буолан тахсаллар. Онон тумуулаабыт киһи дьиэтигэр олоруохтаах, ханна да сылдьыа, ыарыыны тарҕатыа суохтаах, үлэни биэрээччигэ биллэрэн баран, тэйиччиттэн олорон үлэлиэхтээх, эбэтэр, “больничнайга”, уоппускаҕа барыахтаах. Маны кэспит дьон, тэрилтэлэр административнай миэрэҕэ тардыллыахтара, — диэн Айсен Николаев кэпсээтэ.

Ангелина Васильева, «Саха сирэ» хаһыат, edersaas.ru

Хаартыска: интэриниэттэн

0
0
Telegram @edersaas20

Добавить комментарий