«Триумф» успуорт комплексын баазатыгар коронавируһу утары охсуһар эбии амбулаторнай киин сарсыҥҥыттан үлэлээбитинэн барыахтаах.
Бу туһунан СӨ Ил Дархана Айсен Николаев ГТРК «Саха» «Быһа кэпсэтии» биэриитигэр иһитиннэрдэ. Кини манна барыта 175 киһи, ол иһигэр 40 быраас уонна 100 мэдиссиинэ сиэстэрэлэрэ үлэлиэхтэрэ диэн этэр. Күҥҥэ 600-700 киһиэхэ тиийэ көрдөрүөхтэрин сөп диэн бэлиэтиир. Маныаха бу амбулаторнай киин сарсын 14:00 чаастан аһыллар. Дьону-сэргэни күн ахсын сарсыарда 08.00 — 20.00 чааска диэри көрөллөр, икки симиэнэнэн үлэлииллэр.
Кииҥҥэ анаалыһы ылар пууннар, больничнай лииһи толорорго туһунан хостор, ону таһынан анаалыстарын түмүгүнэн эмиэ тус-туспа хосторунан терапевтар көрүөхтэрин туһунан этилиннэ. Маныаха анаалыс түмүгүн кэнниттэн хайдах баран көрдөрүү бэрээдэгэ өйдөнүмтүөтүк, толору ыйыллыбыт.
Маннык киин арыллан үлэлээтэҕинэ, поликлиникаларга алыс элбэх киһи тоҕуоруһара тохтууругар уонна доруобуйа харыстабылын бастакы сүһүөх звенотугар ноҕорууска кыччыырыгар эрэнэрин Ил Дархан этэр.