Бэс ыйын 1 күнүгэр Ил Дархан Айсен Николаев Татарстан Өрөспүүбүлүкэтин премьер-миниистирин солбуйааччы, Татаардар конгресстарын Аан дойдутааҕы национальнай сэбиэттэрин бэрэссэдээтэлэ Василь Шайхразиевтыын көрүстэ. Кинилэр Саха сиригэр Татарстан күннэрин ыытыы туһунан кэпсэттилэр.
Айсен Николаев бу тэрээһин икки эрэгийиэн бииргэ үлэлэһиилэрин кэҥэтиигэ, сайыннарыыга улахан суолталааҕын тоһоҕолоон бэлиэтээтэ.
—Татарстан күннэрин бырагыраамата олус киэҥ, баай ис хоһоонноох, олус элбэх тэрээһиннээх. Онон икки уруулуу норуот сыһыаннара сайдарыгар олук ууруо диэн эрэнэбин. Ол кэмҥэ Туймаада ыһыаҕа буолуоҕа, онно үгэс курдук, Саха сиригэр олорор норуоттар бары кытталлар. Саха норуотун үгэстэрин, үлэбитин-хамнаспытын көрөн-истэн, Саха сирин сөбүлүөххүт диэн эрэнэбин, — диэн кини эттэ.
Василь Шайхразиев Татарстан улахан дэлэгээссийэтин бэрэсидьиэн Рустам Минниханов салайан кэлэрин, парламент, бырабыыталыстыба чилиэннэрэ, култуура, биисинэс бэрэстэбиитэллэрэ, суруйааччылар кэлэллэрин иһитиннэрдэ. Саха сиригэр Татарстан күннэрин бырагырааматын бары тэрээһиннэрэ бигэргэнэн тураллар.
Татарстан күннэрэ бэс ыйын 23-25 күннэригэр буолуохтара. Социальнай-экэнэмиичэскэй сайдыы боппуруостарынан кэккэ сөбүлэһиилэргэ, меморандумнарга илии баттаһыахтара, “Татарстан-Саха сирэ” дьыалабыай пуорум ыытыллыаҕа, Арассыыйа Инновационнай эрэгийиэннэрин ассоциациятын мунньаҕа буолуоҕа. Ону тэҥэ, икки өрөспүүбүлүкэ култуураҕа ситиһиилэрин атастаһыылара, тарбахтарыгар талааннаахтарын быыстапкалара, ускуустуба маастардарын кэнсиэртэрэ, о.д.а. элбэх култуурунай тэрээһиннэр дьон-сэргэ интэриэһин тардыахтара.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru