Бүгүҥҥү күннээҕи туругунан, коронавирус ыарыы балаһыанньата биллэ тупсубутунан, хааччахтааһын миэрэлэрэ сымнатыллыахтарын сөбүн туһунан Ил Дархан бүгүн сыл түмүгүнэн суруналыыстары кытары көрсүһүүгэ эттэ.
edersaas.ru
Кини:
«Өссө төгүл тоһоҕолоон эттэхпинэ, судургута суох сыл ааста. Быйылгы Анал этиибэр бэлиэтээбитим курдук, биһиги бары тургутан көрүү сылын аһаран эрэбит. Сотору 2022 сылга, САССР төрүттэммитэ 100 сылыгар, өрөспүүбүлүкэҕэ биллэриллибит Ийэ сылыгар үктэниэхпит. Былааммыт элбэх, өрөспүүбүлүкэ иннигэр турар соруктары быһаарарга элбэх араас көрүүлэр бааллар», -– диэн үтүө сыл кэлэригэр эрэлин биллэрдэ.
Бүгүҥҥү пресс-кэмпэриэнсийэҕэ Ил Дархан тус олоҕор, үлэтигэр сыһыаннаах боппуруостарга барытыгар тустаах харданы оҥордо. Холобур, эһиил муус устарга РФ Үпкэ министиэристибэтигэр кинини дуоһунас күүтэрин туһунан сабаҕалааһын баарын туһунан туоһуластылар.
Онуоха Ил Дархан:
«Миигин ханна-ханна ыытан көрбөтөххүтүй? Куруук саҥа баһылык талылынна даҕаны, сарсыныгар кини инникитин, ханна тугунан талыллыахтааҕын туһунан дьүүллэһиини таһааран бараҕыт. Ол тиэмэни 5, бэл, 10 сылы быһа ырытаҕыт. Оnтон мин өрөспүүбүлүкэбиттэн ханна да барар санаам суох, күүтүмэҥ даҕаны», -– диэтэ.
Надежда ЕГОРОВА, «Саха сирэ», edersaas.ru
edersaas.ru