Тыа хаһаайыстыбатын сайыннарыы сокуонун, Ил Дархан сылгыны үөрдээн иитиини сайыннарыыга дьаһаллар тустарынан ыйааҕын олоххо киллэрэр инниттэн Тыа хаһаайыстыбатын уонна ас-үөл бэлиитикэтин министиэристибэтэ сылгыһыттар базаларын тутууга субсидия бэриллэр бэрээдэгин бигэргэттэ. Онно олоҕуран, 100 хаһаайыстыба быйыл база туттарыгар 1-дии мөл. солкуобай суумалаах көмө үбү ылыаҕа.
Василий НИКИФОРОВ, «Саха сирэ» хаһыат, https://edersaas.ru/
Куонкуруска б.дь. тохсунньу 1 күнүнээҕи туругунан, 50-тан (хотугу улуустарга – 25-тэн) аҕыйаҕа суох сылгылаах хаһаайыстыбалар уонна тыа хаһаайыстыбатын табаарын оҥорон таһаарар ИП-лэр кытталлар. Субсидия сылгыһыт базатын (онно киирэллэр: олорор дьиэ, гараас, баанньык, сарай, эстакада, сылгы күрүөтэ-хаһаата) тутарга анаан бэриллэр итиэннэ эбийиэк бырайыактыыр-сметнэй сыанатын 60 бырыһыаныгар диэри, ол эрээри, 1 мөл. солкуобайтан таһымнаабат кээмэйдээх буолар.
Кыттааччыттан сайабылыанньа, 24-тх (3-фермер) киэбинэн статотчуот бигэргэммит куоппуйата, бырайыактыыр-сметнэй докумуон куоппуйата, тыа хаһаайыстыбатын туһаныллар сир учаастагын бас билэрин эбэтэр түүлэһэрин туоһулуур докумуон куоппуйата уонна сылгыһыт базатын туттарга муниципальнай уорган бэчээттээх көҥүл куоппуйата ирдэниллэр. Өссө электростанциялаах эбэтэр электроэнергиянан хааччынар автономнай тэриллээх буолуохтаах.
Билигин, чуолкайын эттэххэ, кулун тутар 3-10 күннэригэр министиэристибэҕэ хаһаайыстыбалартан сайаапкалары, докумуоннары тута тураллар. Тыа хаһаайыстыбатын уонна ас-үөл бэлиитикэтин миниистирин солбуйааччы-тыа сирин сайыннарыыга, инвестицияҕа уонна АПК тиһигэр инновацияны киллэриигэ департаменын салайааччы Николай Петров тоһоҕолоон бэлиэтииринэн, субсидия эрдэ тутуллубут базаҕа бэриллибэт, быйыл саҥа туттуллар эрэ аахсыллар. Эбийиэк ороскуотуттан 40 бырыһыанын кэриҥин база туттааччы бэйэтэ уйунар, ол эбэтэр бэйэтин күүһүнэн туттар.
Быйыл кулун тутар 21 күнүгэр Сылгыһыт күнүн өрөспүүбүлүкэ үрдүнэн аан маҥнай бэлиэтиэхпит. Бу күнү Ил Дархан 2016 сыл атырдьах ыйын 22 күнүнээҕи Ыйааҕынан олохтообута. Быстахтык билиһиннэрдэххэ, Сылгыһыт күнэ Дьокуускайга үрдүк таһымнаахтык ыытыллара былааннанар: сылгыһыттар Күөх Хонууттан Кулаковскай аатынан уулуссанан сэлэлии хааман ипподромҥа тиийиэхтэрэ, онно ким идэтигэр бастыҥын быһаарсан илин былдьаһыахтара, ССТХА-гар сылгы бородууксуйатын дьаарбаҥка-быыстапката тэриллиэ, сылгыһыттар, учуонайдар, салайааччылар, дьокутааттар остуол тула олорон салааны сайыннарыы туһунан санаа атастаһыахтара. Саха тыйаатырыгар Сылгыһыт күнүгэр аналлаах дьоро киэһэҕэ Ил Дархан Егор Борисов чулуу сылгыһыттары эҕэрдэлиэ уонна куонкурус кыайыылаахтарыгар 1-дии мөл. солкуобайдаах сертификаттары туттарыа.
Хаартыскаҕа: Нам Бартыһаанын олохтооҕо, удьуор сылгыһыт, бааһынай хаһаайыстыба баһылыга Бүөтүр Новгородов аҕата, настаабынньыга Бүөтүрдүүн базаларыгар. Кини саҥа база туттарга сайаапкатын, докумуонун туттарда. Нам улууһуттан куонкуруска барыта 15 хаһаайыстыба киирсиэҕэ.
Василий НИКИФОРОВ, «Саха сирэ» хаһыат, https://edersaas.ru/ .
Ааптар хаартыскаҕа түһэриитэ.