Быһа сибээс кэмигэр, үгүс сырыылаах “Халыма» суолу аспааллааһын хаһан саҕаланыай?” диэн Ил Дархаҥҥа ыйытыы киирдэ. Тустаах ыйытыыга Ил Дархан маннык хоруйдаата.
Ил Дархан Айсен Николаев, суолу аспааллааһын сыыйа барарын, билигин Төҥүлүттэн Чурапчы хайысхатынан оҥоһулларын, салгыы Чурапчыттан Таатта улууһун диэки барыаҕын эттэ. “Ханнык эрэ түгэҥҥэ тиийэн тохтоон хаалыа диэн куттанар наадата суох. Росавтодорга сүрүн быһаарыы ылыныллыбыта, онон Саха Өрөспүүбүлүкэтин сиригэр федеральнай суолу аспааллааһын салҕаныаҕа. Итиэннэ «Халыма» суолугар эрэ буолбатах, «Бүлүү», «Өлүөнэ» суолларыгар эмиэ”, — диэн эттэ.
Дойду бэрэсидьиэнэ Владимир Путин көҕүлээһининэн олоххо киирбит “Куттала суох уонна хаачыстыбалаах массыына суола” национальнай бырайыак иитинэн, өрөспүүбүлүкэҕэ суол хото өрөмүөннэнэрин, саҥардылларын санатта. “Ааспыт сылга рекорднай уһун суол – 250 км оҥоһулунна”, — диэн иһитиннэрдэ, бу улахан ситиһии буоларын ыйда.
Людмила ПОПОВА, “Саха сирэ” хаһыати, edersaas.ru