Бүгүн, олунньу 9 күнүгэр, Ил Дархан Айсен Николаев эрэгийиэҥҥэ эпидемиологическай быһыы-майгы туһунан улуустар уонна куорат уокуруктарын баһылыктарын кытары мунньахтаата.
Ил Дархан өрөспүүбүлүкэҕэ коронавируһунан ыалдьыы арыый намтаан эрэрин бэлиэтээтэ. Олунньу 4 күнүттэн коронавирус дьаҥынан ыалдьыы ахсаана 90-тан үрдүү илик. Билиҥҥи кэмҥэ, Саха сирэ РФ субъектарын ортотугар 56 кэккэҕэ турар. Икки нэдиэлэ анараа өттүгэр өрөспүүбүлүкэ 40-с, тохсунньу 15 күнүгэр 31-с кэккэҕэ турбута.
Ил Дархан эрэгийиэҥҥэ ыараханнык ыалдьыбыттар ахсааннара аҕыйаабатын эттэ. Билигин 33 киһи ыарахан туруктаах, итинтэн 10 киһи ИВЛ аппараатыгар холбонон сытар.
Айсен Николаев санитарнай эрэсиими сымнатыыттан коронавирус дьаҥа суоһаан туруон сөп диэн этэр. Итиниэхэ билигин даҕаны уустук эпидемиологическай балаһыанньа Мииринэй уонна Томпо улуустарыгар баарын, дьаҥ маассабай туруута Уус Маайаҕа Бэлкэчии бөһүөлэгэр тахсыбытын ыйда. Бу этиллибит улуустар баһылыктара дьаҥы утары охсуһууга уонна кутталлаах вируһу тарҕаппат туһугар суһал миэрэлэр ылыллалларын эттилэр.
Бэбиэскэҕэ маассабай вакцинация боппуруоһа көрүлүннэ. Саха сиригэр вакцина бастакы дозатын 26 298 киһи ылбыт, иккистэрин – 2 628 киһи. Сотору кэминэн саҥа партия аҕалыллара күүтүллэр.
Ил Дархан коронавирустан быһыыны биэриигэ өрөспүүбүлүкэ Арассыыйаҕа лиидэрдэр ортолоругар баарын иһитиннэрдэ итиэннэ бу тэтими ыһыктыбакка сылдьарга эттэ.
Вице-премьер Ольга Балабкина кыһыҥҥы суолунан аһы-үөлү, наадалаах малы-салы тиэрдии үлэтэ бу кэмҥэ ордук күүскэ ыытылларынан, ыраах бөһүөлэктэргэ болҕомтону күүһүрдэр, ирдэбили улаатыннарар наадатын ыйда. Кини Верхоянскай оройуон үөрүйэҕин холобурдаата. Ыраах, уустук суоллаа-иистээх бөһүөлэктэргэ хонтуруол олохтоммутун иһитиннэрдэ уонна атын оройуоннары маннык ньыманан үлэлииргэ ыҥырда.
СӨ Ил Дархана Айсен Николаев билигин быһыы-майгы сыыйа тупсан эрэринэн холкутуйар эрдэ буоларын бэлиэтээтэ. Улуустарга уонна куорат уокуруктарыгар билиҥҥи эпидемиологическай быһыыны-майгыны ыһыктыбакка олорорго, улуустар уонна нэһилиэктэр баһылыктара, тэрилтэлэр салайааччылара кытаанах хонтуруолу туталларыгар, эппиэтинэһи тус бэйэлэрэ сүгэллэригэр соруйда.
Улуустар баһылыктара оҕолор үөрэнэр тэрилтэлэригэр санитарнай туругу хонтуруоллааһыны күүһүрдэллэригэр этилиннэ. Ордук тоһоҕолоон өрөспүүбүлүкэҕэ маассабай тэрээһин бобуулааҕын, ону сэргэ, ОРВИ уонна кириип дьаҥа тарҕамматын курдук кытаанах хонтуруол, кэтээн көрүү ирдэнэрэ ыйылынна. «Коронавирус сыыһары бырастыы гыммат, онон туохха барытыгар сэргэх буолуу эрэйиллэр», — диэтэ Ил Дархан.
СӨ Ил Дархан уонна Бырабыталыстыба пресс-сулууспата
Андрей Сорокин (СИА) хаартскалара
+1
+1
+1
+1
+1
+1
+1