Бүгүн, муус устар 24 күнүгэр, Ил Дархан Айсен Николаев өрөспүүбүлүкэҕэ коронавирус дьаҥа тарҕаныытын утары охсуһар суһал ыстаабы кытары мунньахтаата. Бу туһунан СӨ Ил Дархан уонна Бырабыыталыстыба пресс-сэкирэтээрэ Афанасий Ноев иһитиннэрдэ.
Афанасий Ноев этэринэн, Ил Дархан өрөспүүбүлүкэ үрдүнэн коронавирус балаһыанньата тыҥааһыннааҕын бэлиэтээбит. Бүгүҥҥү күҥҥэ 87 киһи коронавирустаабыта бигэргэммит, ол иһигэр Дьокуускайга -58, Мэҥэ Хаҥаласка -16, Тааттаҕа-4, Алдан, Уус Алдан улууһугар 3-түү киһи, Амма, Хаҥалас уонна Нерюнгри оройуоннарыгар биирдии киһи ыалдьыбыт.
Эрэгийиэн салайааччыта ыалдьыбыт дьон ахсааныттан 70%-на киин куоракка баарын, сүрүннээн эдэр дьон уонна аҕам саастаах дьон ыалдьара элбээбитин бэлиэтээтэ. Ыарахан туруктаахтар ахсааннара балачча аҕыйаабыт. Бүгүҥҥү туругунан 28 ыарыһах реанимацияҕа сытарыттан, 6 киһи ыарахан туруктааҕын эттэ.
Ил Дархан Мэҥэ Хаҥалас улууһугар ыалдьааччы ахсаана элбээбитэ долгутарын эттэ, былырыыҥҥы өрүс суола сабылларын саҕана дьаҥ тарҕаныыта биллэ элбээбитэ хатыланан эрэрин ыйда.
Суһал ыстаап буолаары турар уһун өрөбүллэргэ уопсастыбаннай тырааныспар тэрилтэлэригэр, биирдиилээн уонна кууһунан атыылыыр маҕаһыыннарга, аһыыр сирдэр үлэлэригэр хонтуруолу күүһүрдэллэригэр, маасканы кэтиини ирдииргэ, социальнай ырааҕы тутуһууну, температураны кээмэйдээһини уонна биирдиилээн тэрилтэлэргэ дезинфекцияны ыытарга соруйда. Бастатан туран, Дьокуускай куоракка болҕомтону күүһүрдэри тоһоҕолоото.
СӨ Бырабыыталыстыбатын бэрэссэдээтэлэ Андрей Тарасенко дьон кэлиитин-барыытын хонтуруоллааһын, итиэннэ быһыыны ылыы докумуоннарын бэрэбиэркэлээһин үлэтэ күүһүрбүтүн иһитиннэрдэ, баахтанан үлэ куораттарыттан тахсыы бобуллубутун эттэ. Омук сириттэн кэлбит дьон олорор сирдэригэр уонна үлэлиир тэрилтэлэригэр хонтуруолланалларын, ону тэҥэ кэлээччилэр ПЦР тиэс туттаран анаалыстарын түмүгүн Госуслуга порталыгар угаллара булгуччулааҕын бэлиэтээтэ.
Ис Дьыала миниистирэ Владимир Прокопенко иһитиннэрбитинэн, маасканы кэтиини тутуспатах 55 киһи административнай эппиэтинэскэ тардыллыбыт. Олорор дьиэлэринэн 459 амбулаторнай ыарыһах бэрэбиэркэлэммититтэн 2 киһи бэрээдэги кэспит.
Маай бырааһынньыктарыгар өрөспүүбүлүкэ үрдүнэн быһыыны ылар пууннар уонна медицинскэй организациялар тохтоло суох үлэлиэхтэрэ, ыарыһахтары көрүөхтэрэ. Аныгыскы нэдиэлэҕэ өрөспүүбүлүкэҕэ вакцина кэлэрэ күүтүллэр, ону уһун өрөбүллэр буолуохтарын иннинэ оройуоннарга тиксэриэхтэрэ.
СӨ Ил Дархан уонна Бырабыыталыстыба пресс-сулууспата
Андрей Сорокин хаартыскаҕа түһэриитэ