Ил Дархан суһал ыстаап уочараттаах мунньаҕын ыытта

Ааптар: 
Бөлөххө киир:

Улуустарга уонна куораттарга нэһилиэнньэни вакцинациялааһын боппуруоһа суһал ыстааптарга сүрүн сорук быһыытынан турар.

Бу туһунан бүгүн, олунньу 1 күнүгэр, суһал ыстаабы кытары мунньахха СӨ Ил Дархана Айсен Николаев иһитиннэрдэ.
СӨ Бырабыыталыстыбатын вице-премьерэ, өрөспүүбүлүкэтээҕи суһал ыстаап салайааччытын солбуйааччы Ольга Балабкина СӨ Роспотребнадзор управлениетын чахчыларынан, хоруона хамсыга туруоҕуттан бүгүҥҥү күҥҥэ диэри өрөспүүбүлүкэҕэ уопсайа 30 726 киһи ыалдьыбыта бэлиэтэммит. Итинтэн Дьокуускай куоракка 17 176 киһи, ол эбэтэр 55,9% буолар. Ыалдьыбыт дьонтон 90,8% үтүөрбүт. Кэнники хонукка 90 киһи үтүөрбүтэ бэлиэтэнэр.
Бүтэһик хонукка өрөспүүбүлүкэҕэ 115 киһи COVID-19 дьаҥар хаптарбыта бэлиэтэммит. Мантан үксэ, 42 киһи,  Дьокуускайга олорор. Ону сэргэ, Алдан, Мииринэй, Нерюнгри оройуоннарыгар элбэх киһи ыалдьыбыта ыйыллар. Ол да буоллар, Ольга Балабкина кэнники нэдиэлэҕэ эрэгийиэҥҥэ дьаҥҥа хаптарыы  13,8%, ол иһигэр Дьокуускайга  21,3%, улуустарга 6,5%-нан кыччаабытын бэлиэтиир.
«Саха сиригэр маассабай вакцинациялааһын салҕанар. Горнай, Кэбээйи, Ленскэй оройуоннарыгар быһыыны оҥоруу мөлтөхтүк ыытыллар. Эдьигээҥҥэ уонна Эбээн Бытантайга күн-дьыл туругуттан мэһэйдэтэн, вакцина тиэрдиллэ илик«, — диир Ольга Балабкина.
СӨ Роспотребнадзор управлениетын салайар Маргарита Игнатьева өрөспүүбүлүкэҕэ билиҥҥи кэмҥэ ОРВИ уонна кириип дьаҥын үрдээһинэ биллибэтин эттэ. Ол гынан баран, Дьокуускайга оскуолаҕа олоҕурбут көрүҥүнэн үөрэнии бүгүҥҥүттэн саҕаламмытынан, санитарнай-эпидемиологическай ирдэбили күүһүрдэр наадалааҕын бэлиэтээтэ.
Саха сиригэр олунньуга ковиды утары вакцина улахан партията аҕалыллыахтаах. Бүгүҥҥү күҥҥэ өрөспүүбүлүкэҕэ 8 677 доза вакцина баар, олор үксүлэрэ улуустарга тиэрдиллибиттэр. Бу туһунан СӨ Доруобуйа харыстабылын миниистирэ Елена Борисова иһитиннэрдэ.
Быраабы араҥаччылыыр уорганнар  уопсастыбаннай сирдэргэ хааччахтыыр миэрэлэри төһө тутуһалларын бэрэбиэркэлээн хонтуруоллуур рейдэлэри оҥороллоро салҕанар. Тохсунньу 25 күнүттэн олунньу 1 күнүгэр диэри өрөспүүбүлүкэ үрдүнэн уопсайа биэс тыһыынчаттан тахса профилактическай бэсиэдэ оҥоһуллубут. Уопсастыбаннай миэстэҕэ мааската суох сылдьыы иһин  154 боротокуол толоруллубут. Олорор сирдэринэн уопсайа 2 237 амбулаторнай балыыһа бэрэбиэркэлэммитигэр, кэһии суох. Бу туһунан Ис дьыала миниистирэ Владимир Прокопенко иһитиннэрдэ.
Айсен Николаев мунньах түмүгүнэн, улуустарга нэһилиэнньэҕэ быһыыны туруоруу үлэтин күүһүрдэргэ эттэ. Оттон вакцина тиийэ илик улуустарыгар, күн-дьыл туруга тупсан эрэринэн, чугастааҕы күннэргэ тиэрдэргэ соруйда. Өрөспүүбүлүкэ суһал ыстаабын чилиэннэригэр уонна Бырабыыталыстыба  вице-премьердэригэр бэйэлэрин хайысхаларынан  олоҕу-дьаһаҕы хааччыйар тэрилтэлэр кэлэктииптэрэ быһыыны ылалларын хонтуруоллуулларыгар соруйда.
СӨ Ил Дархан уонна Бырабыыталыстыба пресс-сулууспата
Андрей Сорокин (СИА) хаартыскалара
+1
0
+1
0
+1
0
+1
0
+1
0
+1
0
+1
0