Күн аайы ыытыллар уочараттаах мунньахха Айсен Николаев өрөспүүбүлүкэ бырабыыталыстыбатын иннигэр бастакы уочараттаах сорудахтары туруорда. Бүгүҥҥү күн тыын кыһалҕаларынан халаан уута, ойуур баһаардара уонна сүөһү сиир отун хааччыйыы буолаллар.
Ил Дархан халаан уутун содулун туоратарга туспа хонтуруол наадатын, эмсэҕэлээбиттэргэ анаммыт төлөбүрдэри сөптөөх болдьоххо тиэрдэр үлэни күүһүрдэргэ ыҥырда.
“Ыксаллаах быһыы-майгы кэмигэр биир да хонук улахан болдьох, онон бырабыыталыстыба быһаарыыларын биир хонук иһигэр толорулларын курдук дьаһаныах тустаахпыт, дьоҥҥо көмө төһө кыалларынан түргэнник тиийиэхтээх”, — диэтэ Ил Дархан.
Ойуур баһаардарын туһунан эттэххэ, от ыйын 25 күнүн сарсыардатыгар Саха сирин үрдүнэн 60 ойуур баһаара баара биллэр. Бу ааспыт сыл көрдөрүүлэриттэн 2,5 төгүл аҕыйах. Айсен Николаев олохтоох бэйэни салайыныы салалтатын кытта үлэни күүһүрдэргэ ыҥырда.
Ил Дархан этэринэн, суһал ыстаап үлэтэ күүһүрүөх тустаах. Былырыыҥҥыга тэҥнээтэххэ, баһаар таһыма төһө да намыһаҕын иһин, уот тарҕаныытын тэтимэ күүһүрэн эрэрэ көстөр. Ол курдук, аҥардас ааспыт нэдиэлэҕэ баһаар иэнэ 40-тан 60 тыһ. гектарга диэри улааппыт.
Улуустарга сүөһү аһылыгын бэлэмнээһин үлэтигэр анаан бырабыыталыстыба муниципалитеттарга субсидиялары ыыталыыр, ону кинилэр хаһаайыстыбалар икки ардыларыгар үллэриэхтээхтэр. Быйыл от бэлэмнээһинин былаана 441 тыһ. туоннаҕа тэҥнэһэр.
Егор Карпов, «Саха сирэ» хаһыат.
Хаартыска Мария Васильева