Доруобуйа Уопсастыба

Ил Дархан суһал ыстаабы кытта мунньахтаата

Бүгүн, ыам ыйын 27 күнүгэр, СӨ Ил Дархана Айсен Николаев СӨ суһал ыстаабын кытта мунньахтаата.

Өрөспүүбүлүкэ салайааччыта  хас да оройуоҥҥа коронавирус дьаҥынан ыалдьыы таһыма намтаабытын иһитиннэрдэ. Ол гынан баран,  Дьокуускайтан коронавирус инфекцията тиэрдиллиититтэн, сорох оройуоннарга дьиэ кэргэнинэн дьаҥҥа сутуллуу баара бэлиэтэммитин эттэ.
Билигин Өлөөн, Сунтаар, Бүлүү уонна Амма оройуоннарыгар балаһыанньа ордук улахан хонтуруолга тутуллаллар.
Ил Дархан Манчаары оонньууларынан уонна Өлүөхүмэҕэ Олоҥхо ыһыаҕынан эпидемиологическай куттал суох буолуутун хааччыйыыны күүһүрдэргэ кэлим миэрэлэри оҥорорго соруйда.
Вице-премьер Ольга Балабкина эмтээһин төһө да кэмигэр уонна толору оҥоһуллубутун иһин,  дьаҥ ыараханнык ааһара быһыыттан-майгыттан көстөрүн эттэ.
СӨ сүрүн санитарнай бырааһа Маргарита Игнатьева бүгүҥҥү күҥҥэ 152 924 киһи быһыыны ылбытын, ити нэһилиэнньэ улахан дьонугар 22% тэҥнэһэрин эттэ.
Доруобуйа харыстабылын миниистирэ Елена Борисова сыл анараа өртүгэр стационардарга аҕам саастаах дьон эмтэммит буоллахтарына, билигин көстүү уларыйбытын иһитиннэрдэ. 34,7 % — 30 — 49 саастаах дьон, 14,5 % — 65-ттэн үөһээ саастаахтар, 12 % — 18-29 саастаахтар. Миниистир эппитинэн, балыыһаларга эмп-томп уонна бэйэни харыстанар сириэстибэлэр саппаастара баар.
Андрей Сорокин (СИА) хаартыскаҕа түһэриилэтэ
0
0