Ил Дархан стратегическай көҕүлээһиннэр ааҕыныстыбаларын пуорумугар кыттааччылары кытары сэһэргэстэ
Айсен Николаев стратегическай көҕүлээһиннэр ааҕыныстыбаларын (АСИ) пуорумугар кыттааччылары кытары сэһэргэстэ.
Пуорум экэниэмикэ, социальнай эйгэ хайысхаларыгар саҥа, ураты көрүүлэри киллэрэргэ, дойду технологическай сайдыытыгар туһуланар 100 бастыҥтан бастыҥ идиэйэни түмэр, инициативалаах дьону сомсоҕолуур соруктаах тэриллэр. Айсен Николаев көрсүһүү кыттыылаахтарын эҕэрдэлииригэр, Саха сирэ балачча өрдөөҕүттэн уонна ситиһиилээхтик стратегическай көҕүлээһиннэр ааҕыныстыбаларын бырагыраамаларыгар, бырайыактарыгар кыттарын бэлиэтээтэ.
«Пуорумҥа кыттарга өрөспүүбүлүкэ олохтоохторуттан 124 сайаапка киирбитэ. Барыта олох тускулун сайыннарарга туһуланаллар. Пуорумҥа кыттыы эһиги ураты сонун санааларгытын, бырайыактаргытын салгыы иннин диэки хамсатарга бигэ тирэҕинэн буолуоҕар эрэнэбин. Эһиги бырайыактаргыт бүгүҥҥү уопсастыба, саҥа кэм, саҥа бириэмэ ирдэбилигэр эппиэттиир соруктаах ылыллыбыт улахан суолталаахтар. Инникитин балар өрөспүүбүлүкэҕэ эрэ буолбакка, Уһук Илин эрэгийиэнигэр, бүттүүн дойду үрдүнэн ситиһиилээхтик тарҕаныахтарын, көдьүүстээх буолуохтарын сөп», — диэтэ Айсен Сергеевич.
Уһук Илин федеральнай уокуругар саҥа бырайыактары хамсатарга, сыҕарытарга үлэлэһэр стратегическай көҕүлээһиннэр ааҕыныстыбаларын (СКА, АСИ) бэрэстэбиитэлистибэтин салайар Ольга Курилова, Саха сирэ СКА бырайыактарыгар кыттарга инники сылдьар эрэгийиэн буоларын бэлиэтээтэ. «Пуорумҥа кыттарга IT-технология, цифровизация, социальнай эйгэ, ыччат бэлиитикэтэ, успуорт эйгэтигэр олус интэриэһинэй, сэргэх бырайыактар киллэрилиннилэр. СКА эспиэрдэринэн ТОП-1000 бастыҥ бырайыакка ылылыннылар. Онон, табылыннаҕына, пуорум түмүгүнэн Саха сирин хас да бырайыага ТОП-100 киириэхтэрин сөп диэн эрэнэбин», — диэтэ кини.
Куйаар ситиминэн көрсүһүү кэмигэр, пуорумҥа кыттыыны ылааччылар Ил Дархаҥҥа бырайыактарын билиһиннэрдилэр. Ол курдук, Сардаана Эверстова «Школьный бизнес-марафон», Виктор Салтыков спортивнай туризмы сэҥээрээччилэргэ, сүүрүүнү сөбүлээччилэргэ Арассыыйа куораттарын, эрэгийиэннэрин хабан тэрээһиннэри биир тиһиккэ киллэриини тэрийиигэ, өрөспүүбүлүкэҕэ киинэ тиһигин салайар генеральнай дириэктэр Петр Чиряев киноплатформа бырайыактары билиһиннэрдилэр.
Айсен Николаев кинилэргэ махтанна итиэннэ барыта дьон-сэргэ туһугар туһуламмыт дьикти үчүгэй бырайыактар буолалларын бэлиэтээтэ. «Бырабыыталыстыба уонна тустаах министиэристибэлэр үлэлэспитинэн барыахтара», — диэтэ. Бука барыларын Сочига буолар Бүтүн Арассыыйатааҕы пуорумҥа Саха сирин дьоһуннаахтык ааттаталларыгар баҕарда. Ураты көрүүлээх бырайыактар дойду үрдүнэн тарҕанар кыахтаналларыгар баҕарда.
СӨ Ил Дархан уонна Бырабыыталыстыба пресс-сулууспата
Андрей Сорокин (СИА) хаартыскаҕа түһэриилэрэ