Айсен Николаев Саха Өрөспүүбүлүкэтин Ил Дарханын Харыйатын бастыҥ стипендиаттарын кытта көрүстэ. Ил Дархан оҕолор өрөспүүбүлүкэ, дойду, норуоттар икки ардыларынааҕы таһымнаах олимпиадаларга, күрэхтэһиилэргэ ситиһиилэринэн, кутталлаах түгэҥҥэ хорсун быһыыларынан киэн туттарын уонна үөрэрин биллэрдэ.
Ил Дархан 2020 сыл ураты, уустук сыл буолбутун, ол эрээри, Саха сирин олохтоохторун өссө күүстээх уонна түмсүүлээх оҥорбутун, тугунан да сыаналаммат уопуту биэрбитин бэлиэтээтэ.
“Биһиэхэ олус элбэх өйдөөх уонна талааннаах оҕолор баалларыттан үөрэбин. Эһиги өрөспүүбүлүкэбит инники кэскиллэрэ буолаҕыт. Уопсастыбаҕа туһалаах дьон буоларга талаһыыгыт улаханнык сыаналанар. Эһиги бүгүҥҥү соруккут – билиини сомсуу уонна кыһаллан үөрэнии. Үөрэх кэлэр кэм бастыҥ инвестицията буолар” – диэн Айсен Николаев оҕолорго туһаайан эттэ.
Стипендиаттарга араас ыйытыылары биэрэн Ил Дархантан бэйэтиттэн тута хоруйдары ыллылар.
СӨ Ил Дарханын Харыйатын стипендиаттарын ааттарыттан Дьокуускай куораттааҕы 2-с нүөмэрдээх национальнай политиэхиньиическэй оскуола 11-с кылааһын үөрэнээччитэ Герман Тастыгин тыл эттэ.
Герман учууталларыгар, ордук ыраахтан олорон (дистанционно) үөрэнии түргэнник киирбит кэмигэр идэлэригэр бэриниилэрин, Ил Дархан Айсен Николаевка үөрэнээччилэр идиэйэлэрин өйүүрүн иһин махталын биллэрдэ. “Моя законотворческая инициатива” диэн Бүтүн Арассыыйатааҕы куонкуруска хамаанданан кыттыыларын кэпсээтэ. Онно кинилэр сэрии буолбут толоонноро миинэттэн сыһырыыларын кыһалҕатын туһунан бырайыактара өйөбүлү ылбыт.
“Бу идэбитин таларбытыгар уонна инники былааммытын оҥосторбутугар көмөлөстө. Биһиги өрөспүүбүлүкэбит, дойдубут дьоһуннаах гражданнара буоларга уонна бэйэбит кылааппытын киллэрэргэ дьулуһуохпут” – диэн стипендиат эттэ.
Бастыҥ үөрэнээччилэргэ аналлаах СӨ Ил Дарханын Харыйата 1998 сылтан ыытыллар. Бу сыллар тухары Саха сирин 14 тыһыынчаттан тахса талааннаах үөрэнээччитэ кытынна. Быйыл эпидемиологическай балаһыанньанан сибээстээн, 10 бастыҥ стипендиаты кытта көрсүһүү видеонан сибээс нөҥүө барда.
СӨ Ил Дарханын уонна Бырабыыталыстыбатын пресс-сулуспата.
Хаартыска: Андрей СОРОКИН (СИА).