Ил Дархан үтүө үгэскэ кубулуйбут харыйата быйыл ахсынньы 23 күнүгэр, СӨ циркэтин дьиэтигэр буолаары турар. Сыл улахан тэрээһинигэр өрөспүүбүлүкэ араас муннуктарыттан, уопсайа 700 оҕо кыттыаҕа.
“Саха сирэ” хаһыат, edersaas.ru
Тустаах тэрээһин таһыма да, суолтата даҕаны сыллата үрдээн иһэр. Ол курдук, харыйаҕа кэлбит оҕолор циркэҕэ ыытыллар тэрээһининэн эрэ муҥурдамматтар. Араас бырагыраамалара киэҥ. Быйыл үөрэх тэрилтэлэринэн, тыйаатырдарынан, киинэ тыйаатырдарынан сылдьыахтара, биллиилээх бэлиитиктэри, спортсменнары, уопсастыбаннай диэйэтэллэри кытта көрсүөхтэрэ.
Итини таһынан, Ил Дархан харыйатын ыҥырыылаахтарыгар 25 тыһыынча солкуобайдаах истипиэндийэ көрүллэр. Санатан эттэххэ, урукку сылларга бааҥҥа анал счет арыйан харчыларын онно түһэрэллэрэ, биир кэмҥэ ноутбук бэлэх тутар этилэр.
Аны быйылгыттан М.К.Аммосов аатынан Хотугулуу-Илиҥҥи федеральнай университет үөрэххэ тутар быраабылатыгар олоҕуран, бакалавриат, специалитет бырагыраамаларыгар туттарсааччыларга баал эбиллэр буолбута. Онно олоҕуран, 2020 сылга туттарсааччылар СӨ Ил Дарханын стипендиаттара буолалларын туоһулуур докумуоннаах буоллахтарына, 7 баал эбиллэр. Хас даҕаны докумуоннаах түгэннэригэр, үөрэххэ туттарсааччы бэйэтэ талан, онтон биирэ учуоттанар. Докумуон 2018-2019, 2019-2020 сылларга бэриллибит буолуохтаах. Онон үөрэнээччигэ бары өттүнэн барыстаах. Оҕо үөрэххэ ситиһиитэ, араас тэрээһиҥҥэ кыттыыта үрдүктүк сыаналанар. Кытаатыҥ!
Людмила ПОПОВА, “Саха сирэ” хаһыат, edersaas.ru