Бэлиитикэ Сүрүн

Ил Дархан социальнай тутууларга ылсыбыт хампаанньалар үлэлэрин хонтуруоллаата

Ил Дархан Айсен Николаев бүгүн судаарыстыба уонна чааһынай хампаанньалар кыттыһан тутар эбийиэктэрин, хампаанньалары кытары түһэрсиллибит дуогабардар туолууларын хонтуруоллуур суһал ыстаап мунньаҕын ыытта.

Бу хайысханан биһиги өрөспүүбүлүкэбитигэр социальнай тутуулартан Дьокуускайга 2-с №-дээх поликлиника, 120 миэстэлээх анал интернат-оскуола, Судаарыстыбаннай филармония уонна Эпос, искусства арктикатааҕы кииннэрэ, “Хотугу сулус” диэн сылы эргиччи оҕолору сынньатар, үөрэтэр киин олоххо киириэхтээхтэр.

Мунньахха иһитиннэрбиттэринэн, Дьокуускай куорат 2-с нүөмэрдээх балыыһатын тутуутун докумуонун судаарыстыбаннай экспертизатын кэтэһэллэр. Билигин тутуу барыахтаах сирин бэлэмнии сылдьаллар.

Онтон атын тутууларга үлэ былаан быһыытынан бара турар. Холобур, Сайсары күөл кытылыгар тутулла турар Арктикатааҕы киин сыбаайата барыта түһэн эбийиэк тутулун оҥоро сылдьаллар. Айсен Сергеевич итиннэ даҕатан, тутуулар былааннарын хайаатар да тутуһарга, үбүлээһинин, техническэй боппуруостарын кэмигэр быһааран иһэргэ эттэ. Билигин интернат-оскуола гаастааһынын, ону сэргэ Арктикатааҕы киин таһын, Сайсары күөл кытылын, биир кэлимник тупсаран оҥоруу боппуруостара тураллар.

Аграфена КУЗЬМИНА, “Саха сирэ” хаһыат

0
0