«Болҕомтону тардар, ирдэнэр бырайыактар. Эһиги итиннэ туох баар билиигитин, кыһамньыгытын уураҕыт, саҥа толкуйу, быһаарыыны көрдүү, тобула сылдьаргыт олус үчүгэй«, — диэн Ил Дархан хамаанда кыттыылаахтарыгар туһаайан эттэ.
«Sinet Spark» пуонданы төрүттээччи Арсен Томскай Саха сирин дьонугар чахчы наадалаах, суолталаах, чугас бырайыактар талыллыбыттарын кэпсээбит. Ол курдук бырайыактарга Дьокуускай быылын намтатыыга ылсыы, куорат уулуссаларыгар уонна болуоссаттарыгар үүнээйини олордуу, бөх умайыытын эрдэттэн билэр систиэмэни киллэрии, Дьокуускай куорат олохтоохторун сибиэһэй оҕуруот аһынан, фруктанан хааччыйарга тоҥоруу саҥа көрүҥүн чинчийии, о.д.а. киллэриллибиттэр.
Ил Дархан сорудаҕынан,» Sinet Spark» хамаандаҕа өрөспүүбүлүкэттэн тустаах министиэристибэлэр, биэдэмистибэлэр уонна Дьокуускай куорат дьаһалтата көмөлөһүөхтэрэ.
Санатан эттэххэ, «Sinet Spark» пуонда – Саха сиригэр кыһалҕалаах боппуруоһу көрдүүр , булар уонна ону быһаарыыны олоххо киллэрэр кэммиэрчэскэйэ суох бырайыактыыр тэрилтэни Арсен Томскай төрүттээбит. Бу пуонда нөҥүө Арсен Томскай быйыл Саха сиригэр ойуур баһаардарын утары охсуһууга көмөнү оҥорбута. Ол курдук, 15 мөл. солк. ойуур баһаарыттан эмсэҕэлээбит оройуоннарга тэрил ылалларыгар анаан ыыппыта. Манна даҕатан эттэххэ, кини коронавируһу утары охсуһууга эмиэ көмөлөспүтэ. 2020 сыллаахха А.Томскай уонна кэллиэгэлэрэ («MyTona») балыыһаларга ИВЛ аппарааттарын ылалларыгар, ыраахтан мээрэйдиир кыраадыһы ылалларыгар анаан 15 мөл.солк. биэрэн тураллар. 2020 сыллаахха Арсен Томскай көҕүлээһининэн «Star Team» бырайыак тэриллибитэ. «InDriver» хампаанньаны төрүттээччи уонна дириэктэр талааннаах үөрэнээччилэр аан дойду саамай бастыҥ үрдүк үөрэҕин кыһаларыгар киирэргэ бэлэмнэнэллэригэр өйөбүлү оҥорор. Онно тэрийбипт пуондатыттан, үс сыл устатыгар кууруска бэлэмнэнэллэригэр уонна үрдүк үөрэх кыһатыгар киирдэхтэринэ харчы төлөнөр.
Андрей Сорокин (СИА) хаартыскаларга түһэриитэ