Ил Дархан сибээс миниистирин бэрэбиэркэ кэмигэр дуоһунаһыттан босхолоото
Өрөспүүбүлүкэ баһылыгын быһаарыытынан, СӨ Сибээскэ уонна информационнай технологияларга миниистирэ Александр Борисов бэрэбиэркэ кэмигэр дуоһунаһыттан босхолонно. Бу туһунан өрөспүүбүлүкэ баһылыгын уонна бырабыыталыстыбатын дьаһалтатын информационнай бэлиитикэҕэ салайааччыта Станислав Платонов иһитиннэрдэ.
edersaas.ru
Санатар буоллахха, бүгүн СӨ Борокуратууратын пресс-сулууспата иһитиннэрбитинэн, өрөспүүбүлүкэ борокуратуурата РФ Куттал суох буолуутун федеральнай сулууспатын Саха сиринээҕи управлениетын иһитиннэриитинэн хоруупсуйаны утары сокуону тутуһууга бэрэбиэркэ ыыппыт. Ол түмүгэр, СӨ Сибээскэ уонна информационнай технологияларга миниистирэ Александр Борисов үлэтигэр кэһиилэри булбут.
Бэрэбиэркэ быһаарбытынан, миниистир дуоһунаһа өрөспүүбүлүкэ судаарыстыбаннай дуоһунаһыгар киирсэринэн, Александр Борисов «интэриэстэр конфликтарыгар» сыһыаннаах кэһиилэри таһаарбыт.
РФ Куттал суох буолуутун федеральнай сулууспатын Саха сиринээҕи управлениета бэрэбиэркэ матырыйаалларын силиэстийэ уорганнарыгар ыыппыт. Ол түмүгүнэн процессуальнай уураах тахсыаҕа.
Биһиги корр., «Саха сирэ» хаһыат, edersaas.ru
Хаартыска: ЯСИА
+1
+1
+1
+1
+1
+1
+1