Бырабыыталыстыба отчуотун кэмигэр үгүс сиргэ нэһилиэнньэ “Сбербаан” терминаллара, банкоматтара тиийбэттэрин, нэһилиэктэргэ баан өҥөтө наадатын эппиттэрэ. Ил Дархан Егор Борисов “Сбербаан” Байкаллааҕы баанын бэрэссэдээтэлэ Александр Абрамкинныын көрсөн ити туһунан кэпсэттэ.
“Сбербаан” 2001 сылга диэри Россия үрдүнэн барыта 79 регионнааҕы бааннаах эбит буоллаҕына, ити сыл хас да субъегы биир сиргэ түмэн, 17-ҕэ диэри кыччаппыта. Билигин 12 регионнааҕы бааннаах. Биһиги региоммутун Иркутскайга баар Байкааллааҕы баан көрөр. Бу баан Иркутскай уобалаһы уонна Саха сирин таһынан икки региону, Забайкальены, Бурятияны, көрөр.
Урукку сылларга “Сбербаан” нэһилиэктэргэ барыларыгар кэриэтэ каассалаах буоллаҕына, билигин суоҕун кэриэтэ, баан “барыһа суох” диэн ааттаан сарбыйбыта ыраатта. Егор Борисов көрсүһүү кэмигэр “Сбербаан” нэһилиэктэргэ илиитэ тиийбэтин, суола-ииһэ суох, ыраах сытар нэһилиэнньэлээх пууннарга баан өҥөтө суоҕун иһитиннэрдэ. Холобур, быйылгы отчуот кэмигэр Өлөөн улууһугар биир терминал алдьанан хаалан, уочарат тахсыбыт. Алдан Аллараа Куранааҕар, Эдьигээн улууһугар өссө эбии терминалы туруорсаллар. Оттон Орто Халыма улууһа баан үлэлиир кэмин уларыппытын, нэһилиэктэргэ отделениелар сабыллыбыттарын, үлэ миэстэтэ сарбыллыбытын эттилэр.
“Сбербаан” иһитиннэрэринэн, билигин Саха сиригэр 418 терминаллаахтар. Биллэн турар, баан ханна нэһилиэнньэ ахсаана элбэх да онно талаһар. Александр Абрамкин бэлиэтииринэн, банкоматтар сибээс үчүгэй, инкассация тиийэр сиригэр туруохтаахтар. Инкассация тиийбэт сиригэр анал харабыллары наймылаһаллар эбит. Ити барыта эбии ороскуот. “Банкоматтары, терминаллары туруорарбытыгар нэһилиэк экэнэмиичэскэй сайдыытын бастакы уочарат көрөбүт. Ону сэргэ “Сбербаан” үгүс каассата хаарбах дьиэлэргэ тураллар. Онон хайа да нуормаҕа, быраабылаҕа кыайан эппиэттээбэттэр. Ол эрээри киэҥ сирдээх-уоттаах Саха сирин бүтүннүү хабар, өҥөлөрбүтүн тириэрдэр, хаҥатар сыаллаахпыт. Билигин “Сбербаан” отделениеларыгар үлэһиттэри элбэтэр барыйааны үөрэтэ сылдьабыт”, — диэн бэлиэтиир көрсүһүү кэмигэр Александр Абрамкин.
Манна эбэн эттэххэ, бырабыыталыстыба нэһилиэнньэҕэ баан өҥөтүн хаҥатар сыалтан “Почта бааны” кытары үлэлэһэн, билигин баан үгүс сиргэ пууннарын аһыталаан эрэр.
Аграфена КУЗЬМИНА, «Саха сирэ» хаһыат, edersaas.ru