Ил Дархан: «Сарсын эбии 200 быыһааччы уонна икки Бе-200 сөмөлүөт кэлэрэ күүтүллэр»
Ил Дархан Айсен Николаев бүгүн Нам улууһугар үлэлээтэ.
Ол туһунан инстаграмҥа: «Билигин Нам улууһугар ойуур баһаардарынан балаһыанньата тыҥааһыннаах. Ойуур баһаара Фрунзе, Таастаах, Көбөкөн уонна Улуу Сыһыы нэһилиэктэригэр ордук кутталы үөскэтэр. Таастаахха улахан бөлөх үлэлиир. Бэҕэһээ манна вице-премьер Дмитрий Садовников салайыытынан доброволецтар уонна байыаннай техника кэлбиттэрэ. Бүгүн миэстэтигэр ойуур баһаарын умулларааччылары кытары көрсөн кэпсэттим. Тыал күүһүрэн баһаар 40 км диэри улааппыт. Фрунзеҕа уонна Көбөкөҥҥө федеральнай резервэттэн эбии үлэһиттэр кэлиэхтэрэ«, — диэн суруйда.
Ил Дархан Намтан көтөн кэлээтин кытта РФ бэрэсидьиэнэ Владимир Путин төлөпүөнүнэн эрийбитин туһунан иһитиннэрдэ.
«Ойуур баһаардарын утары үлэ уонна туох миэрэлэр оҥоһуллалларын туһунан кэпсээтим. Владимир Владимирович Бэс Күөл олохтоохторугар эбэһээт көмөнү оҥорор уонна федеральнай киинтэн көмөҕө этиилэри киллэргэ эттэ. Маны таһынан бэрэсидьиэн ЫБММ бөлөҕүн улаатыннарарга сорудахтаата«, — диэн эбэн суруйда.
Онон номнуо сарсын икки Бе-200 сөмөлүөт кэлэн уонна ЫБММ 200 быыһааччылара ойуур баһаардара турбут нэһилиэнньэлээх пууннарыгар барыахтара.
edersaas.ru