Бүгүн, алтынньы 1 күнүгэр, Ил Дархан Айсен Николаев аан дойду таһымнаах успуорт маастарын, Москватааҕы сүүрүү марафонун кыайыылааҕын Сардаана Трофимованы уонна кини тириэнньэрин Татьяна Жиркованы кытта көрүстэ.
Айсен Сергеевич спортсмены эҕэрдэлээтэ:
— Биһиги марафону көрө олорбуппут, эн тускар ыалдьыбыппыт, дьиҥ кыахтааххын дакаастаатыҥ, — диэтэ.
Сардаана Трофимова Токио куоракка ыытыллыахтаах Олимпиадаҕа кыттарыгар эрэнэрин иһитиннэрдэ уонна инникитин күрэхтэһиилэргэ бэлэмнэнэригэр уонна кыттарыгар өйүүрүн эттэ. Онуоха Сардаана бу алтынньы ый ортото Киргизияҕа сүүмэрдээһиҥҥэ бэлэмнэнэрин, ахсынньы ыйга Сочи куоракка Арассыыйа чөмпүйэнээтэ ыытылларын кэпсээтэ.
Билигин Сардаана Токиоҕа ыытыллар Олимпиадаҕа кыттарын дуу, суоҕун дуу туһунан боппуруос быһаарылла сылдьар. Арассыыйаҕа чэпчэки атлетикаҕа 10 кубуота баар эбит. Бүтэһик быһаарыныыны чэпчэки атлетикаҕа Норуоттар икки ардыларынааҕы Федерация ылыныахтаах.
Ил Дархан Сардаана Трофимоваҕа успуорт эйгэтигэр ситиһиитин иһин СӨ үтүөлээх үлэһитэ ааты иҥэрдэ. Оттон Татьяна Жирковаҕа СӨ Бырабыыталыстыбатын бочуотунай грамотатын туттарда.
Ульяна Захарова.