Ытыктабыллаах Саха сирин олохтоохторо!
Саха Өрөспүүбүлүкэтин салалтатын уонна тус бэйэм ааппыттан эһигини Ыам ыйын 1 күнүнэн – Сандал саас уонна Үлэ бырааһынньыгынан эҕэрдэлиибин!
Бу ураты күнү араас көлүөнэ дьон бары үөрэн-көтөн, өрө көтөҕүллэн көрсөр. Бу бырааһынньык араас саастаах, араас идэлээх дьону сомоҕолуурун таһынан, айылҕа тыйыс тымныылаах уһун кыһын кэнниттэн уһуктуутун бэлиэтэ буолар. Ыам ыйын бастакы күнүн кытта биһиги үтүө уларыйыыларга, эйэлээх, дьоллоох уонна бигэ олоххо эрэлбитин ситимниибит.
Дьаҥ туруута уустук быһыыны-майгыны үөскэтэн, биһиги иккис сылын Сандал саас уонна Үлэ бырааһынньыгар киин уулуссаларынан сэлэлии хаамар үгэспититтэн, дьон-сэргэ тоҕуоруһар тэрээһиннэриттэн, доҕоттордуун көрсүһүүттэн уонна айылҕаҕа тахсыыттан туттунарга күһэлиннибит. Бары этэҥҥэ буоларбыт туһугар ыам ыйынааҕы өрөбүллэри дьиэ кэргэнинэн дьиэбитигэр атаардахпытына табыллар.
Ол эрээри, төһө да уустугун иһин, бары сөбүлүүр бырааһынньыкпыт суолтата өлбөөдүйбэт. Бүгүн биһиги үгэс быһыытынан үлэ дьонун – бэйэлэрин талааннарынан, идэлэригэр маастарыстыбаларынан төрөөбүт Сахабыт сирин аатырдар, өрөспүүбүлүкэбит этэҥҥэ буоларын уонна чэчирии сайдарын туһугар үлэлии-хамсыы сылдьар үтүө дьоммутун чиэстиибит.
Бу уустук кэмҥэ коронавируһу утары охсуһар быраастарга, медицинэ үлэһиттэригэр махтал истиҥ тылларын этэбит, бары үлэлээн иитиллээччилэргэ махталбытын тиэрдэбит. Хас биирдиигит кыһамньытынан пандемия саамай уустук кэмнэрин этэҥҥэ ааспыппыт, экономика улахан кириисиһиттэн быыһанныбыт.
Күндү доҕоттор!
Саха сирин олохтоохторо көхтөөх, айымньылаах, умсугутуулаах үлэнэн эрэ олохпут дьиҥ суолталанарын, оҕолорбут сырдык кэскиллэрэ мэктиэлэнэрин өйдөөн, уопсай сыалы ситиһэргэ мэлдьи бииргэ түмсэн, сомоҕолоһон үлэлииллэр.
Бу сааскы кэрэ күҥҥэ эһиэхэ саҥа ситиһиилэри баҕарабын! Үүммүт саас саҥа санаалары сахтын, үлэҕит мэлдьи табылыннын! Эһигини уонна чугас дьоҥҥутун кытта эйэ эҥэрдэстин, үтүө санаа аргыстастын!
Саха Өрөспүүбүлүкэтин Ил Дархана А.С. Николаев