«AITA” – Саха Өрөспүүбүлүкэтин Ил Дарханын саҥа көмөлөһөөччүтэ. Бу цифровой сыһыарыы бэс ыйын 1 күнүттэн үлэтин саҕалаабыта.
“Цифровой” көмөлөһөөччү олохтоохтор этиилэрин, кыһалҕаларын туһааннаах былаас уорганыгар тиэрдэр сүрүн соруктаах. Ил Дархан Айсен Николаев, цифровой систиэмэни хото туһаннахпытына, олохтоохтору кытта үлэ хаачыстыбата үрдүө, тупсуо диэн эрэнэрин биллэрэр.
Бу сыһыарыыны хайдах туһанабытый? 51-00-00 нүөмэргэ эрийэҕит уонна инструкциянан сирдэтэҕит: маҥнай ааккытын-суолгутун этэҕит, төлөпүөҥҥүт нүөмэрин “хантаак” быһыытынан туһаналларыгар сөбүлэһэргитин биллэрэҕит, ол кэннэ дьэ этиигитин, туох кыһалҕалааххытын кэпсиигит.
Сыһыарыы искусственнай интеллект баазатыгар айыллыбыт буолан бэрт кылгас кэм иһигэр туһааннаах аадырыска тиэрдэр кыахтаах уонна харда хаһан кэлэрин көрөр-истэр. Киирбит иһитиннэриини (информацияны) маҥнай “One сlick Yakutia” платформаҕа тиэрдэр. Манна сайаапканы ис хоһоонунан, туох кыһалҕаны таарыйарынан көрөн сааһылыыр (классификациялыыр). Ол кэннэ эппиэттиир былаас уорганыгар салайар. Цифровой систиэмэҕэ “хоруй” диэн эппиэт киирдэр эрэ, “AITA” сайаапканы биэрээччигэ төттөрү эрийэн эппиэти тиэрдэр.
“Цифровой” көмөлөһөөччү үчүгэйэ диэн, суукканы быһа тохтообокко үлэлиир. Инньэ гынан, олохтоохтор үлэ чааһыгар эрэ буолбакка, бэл, оннооҕор түүн кытары кыһалҕаларын, наадаларын кэмтэн тутулуга суох этинэр кыахтаахтар. Маны таһынан, сервис үлэтин схемата судургутуйда. Өскөтүн урукку өттүгэр электроннай ньыманан сайаапканы биэрэргэ “One сlick Yakutia” платформаҕа киирэн “веб-форманы” хайаан да толорор эбит буоллаххына, билигин цифровой көмөлөһөөччү бэйэтэ быһа оҥорор. Бу саҥа арыйыы олохтоохторго улахан туһалаах, көмөлөөх буолла. Холобур, саастаах дьон онлайн-сервиһи тутталларын ыарырҕаталлар. Сорох улууска интэриниэт сибээһэ мөлтөх, хааччахтаах.
“AITA” үлэлээн саҕалыаҕыттан олохтоохтортон номнуо 800 этии, ыйытыы киирдэ. Дьону ордук долгутар сүрүн кыһалҕаларынан олох-дьаһах, хомунаалынай хаһаайыстыба боппуруостара, хаарбах туруктаах дьиэттэн көһөрүү, гааһы киллэттэрии, суолу өрөмүөннээһин, социальнай көмөнү (өйөбүлү) туһаныы, коронавирус дьаҥыттан быһыыны ылыы туһунан уо.д.а. буолаллар.
“AITA” үлэтин биир сүрүн сыала – киирбит ыйытыыга харданы ылыы уонна ону тиэрдии. Биир кэриҥэ ый иһигэр цифровой сыһыарыы дьоҥҥо элбэх көмөнү оҥордо. Олортон икки түгэни кэпсиибит.
“Санрейс” кыһалҕатын быһаарбыта
Өрөспүүбүлүкэ ыраах сытар улуустарыгар санитарнай көтүү тиийбэтэ – биир сытыы кыһалҕабыт. Бу кыһалҕа дьаҥ кэмигэр ордук билиннэ. Маннык судургута суох кыһалҕаны быһааран, “AITA” дьоҥҥо-сэргэҕэ, норуокка дьиҥ чахчы туһалааҕын бигэргэттэ. Ол курдук, бэс ыйын 22 күнүгэр Алдан оройуонун олохтооҕо “цифровой” көмөлөһөөччүгэ эрийэн дьаҥҥа сыстыбыт ыарахан туруктаах дьоҥҥо санитарнай көтүүнү кыайан ыҥырбакка олороллорун туһунан эппитэ. “Цифровой” көмөлөһөөччү киирбит этиини туһааннаах тэрилтэҕэ тиэрдэ охсон, сарсыҥҥы күнүгэр Чагдаттан уонна Кутанаттан икки киһини бөртөлүөтүнэн аҕалтарары ситиспитэ. Ити курдук, “санрейс” кэмигэр тиийэн дьон олоҕун быыһаабыта.
“AITA” субсидиялаах билиэти атыылаһарга көмөлөспүтэ
Ил Дархан “цифровой” көмөлөһөөччүтүгэр 1 группалаах инбэлиит Арсений Винокуров эрийбит. Эдэр киһи “Москуба-Дьокуускай” маршрутунан субсидиялаах билиэти кыайан булбакка олороро. Маҥнай көтөр хампаанньаттан ыйыппытын “сайын устата чэпчэтиилээх билиэт атыыга тахсыбат” диэн аккаастаабыттар.
51-00-00 нүөмэргэ эрийбит. Көрдөһүүтэ Тырааныспар министиэристибэтигэр тиийэ охсон кылгас кэм иһигэр кыһалҕата быһаарыллыбыт. Арсений Дьокуускайга этэҥҥэ көтөн кэлэн олорор.