Ытыктабыллаах Сахам сирин олохтоохторо!
Эhигини барыгытын Саха Өрөспүүбүлүкэтин салалтатын аатыттан уонна тус бэйэм кэлэн иhэр саргылаах Саҥа Дьылынан уонна Ороһуоспанан итиитик-истиҥник эҕэрдэлиибин!
Киэҥ нэлэмэн Сахабыт сирин куораттарын уонна бөһүөлэктэрин олохтоохторо, биһиги бары, кириэмил курааннарын охсуутун долгуйа күүтэбит. Саҥа дьылы ааспыт сыл аҕалбыт бары үтүө күннэригэр махтана көрсөбүт.
2018 сылга өрөспүүбүлүкэбит олохтоохторо үлэҕэ, наукаҕа, искусствоҕа, спорка бэртээхэй ситиһиилэннилэр. Сахабыт сиригэр элбэх саҥа ыал үөскээтэ, үгүс кырачаан дьон күн сирин көрдө. Өрөспүүбүлүкэбит нэһилиэнньэлээх пууннарыгар олох-дьаһах, оҥорон таһаарыы кэккэ эбийиэктэрин тутан үлэҕэ киллэрдибит.
Ааспыт сылга Сахабыт сирин олохтоохторо улахан алдьатыылаах халаан уутун содулун туоратыыга түмсүүлээхтэрин, биир сомоҕо буолалларын көрдөрдүлэр. Бөһүөлэктэрбитин кэнники 18 сылга кэлбэтэх улахан уу ыла сырытта. Онуоха биһиги бары бииргэ, дьон кыһалҕатыттан туора турбакка, эмсэҕэлээбиттэргэ көмөлөһөн, халаан содулун кэмигэр үмүрүттүбүт. Ити, биһиги түмүстэхпитинэ, тугу баҕарар кыайар кыахтаахпытын туоһулуур!
Саҥа дьылтан биһиги, биллэн турар, үтүөнү, үчүгэйи, саҥа хамсааһыннары күүтэбит. Былааннарбыт төрөөбүт дойдубутун кытта быһаччы ситимнээхтэр. Өрөспүүбүлүкэбит сайдыыта биһиги барыбыт үлэбит түмүгүттэн, бииргэ буолуубутуттан уонна эппиэтинэспититтэн тутулуктаах.
Сахабыт сиригэр биллэриллибит Сомоҕолоһуу сылыгар хас биирдии олохтооох сайдыылаах өрөспүүбүлүкэҕэ, кыахтаах-уохтаах, модун Арассыыйаҕа олорорунан киэн туттарыгар дьулуһуохпут. Биһиги бары бииргэ эрэ буоллахпытына, иннибит диэки эрэллээхтик хардыылыыр, хайа баҕарар тургутуулары ааһар уонна уустук соруктары толорор кыахтаныахпыт!
Күндү сахам дьоно!
Биһиэхэ олоххо күүһү-сэниэни, эрэли чугас дьоммут таптала, сылааһа биэрэр. Үлэбититтэн кэлэрбитигэр дьиэбитигэр эрэнэ күүтэр, ыарахан түгэммитигэр өйүүр-убуур, санаабытын көтөҕөр, кыайыыбытыгар тэҥҥэ үөрсэр дьоммут – кинилэр. Онон дьиэ кэргэн – хас биирдиибит олоҕор саамай сүрүн, саамай күндү!
Саҥа дьылга эһиги олоххутугар сырдык, үтүө күннэр үүннүннэр, хас биирдии дьиэҕэ эйэ, ытыктабыл, баай-дуол, дьол-соргу олохсуйдун. Чэгиэн-чэбдик буолуҥ, бэйэ-бэйэҕитигэр, чугас дьоҥҥутугар харыстабыллаахтык,
болҕомтолоохтук сыһыаннаһыҥ! Бары баҕа санааҕыт туоларыгар, табылларыгар баҕарабын!
Саха Өрөспүүбүлүкэтин Ил Дархана Айсен Николаев.