Күн бүгүн өрөспүүбүлүкэҕэ ойуур баһаардарынан быһыы-майгы тыҥааһыннаах. Уоту утары охсуһууга күнүстэри-түүннэри 3 тыһыынча кэриҥэ киһи үлэлиир. Бүгүн, от ыйын 12 күнүгэр, Ил Дархан Айсен Николаев «Россия24» телеханаалга ойуур баһаардарын туһунан кэпсээтэ.
Айсен Сергеевич бүгүҥҥү туругунан 73 баһаары умулларыыга үлэ ыытылларын эттэ. Ааспыт сууккаҕа 16 баһаар бохсуллубут. «Ардах түһэн уоту умулларыыга төһүү күүһүнэн буолла. Ан-26 сөмөлүөт көмөтүнэн искусственнай ардах киин улуустарга түстэ. «Өлүөнэ очуостара» айылҕа пааркатыгар балаһыанньа кытаанах. Билигин онно 9 ойуур баһаара баар. Оборона министиэристибэтин авиацията улахан көмөнү оҥорор. Маны таһынан ЫБММ авиацията ыйы быһа арҕаа оройуоннарга үлэлээтэ. Билиҥҥитэ 3 тыһыынча кэриҥэ киһи уоту утары охсуһууга үлэлиир«, — диэн Ил Дархан кэпсээтэ.
edersaas.ru