Бүгүн СӨ Ил Дархана Айсен Николаев «Россия 24» телеханаалга быһа эфиргэ кытынна. Онно өрөспүүбүлүкэҕэ ойуур баһаардарынан тыҥааһыннаах балаһыанньа үөскээбитин эттэ.
«Саха сиригэр сайыммыт олус итии, кураан буолла. Гидрометкиин статистикатын көрдөххө, бэс ыйыгар кэтээн көрүүнэн, саамай итии күннэр турбуттар. Үгүс оройуоннарга +37, +39 кыраадыска тиийэ сырытта. Бэс ыйыгар олох кыра сөҥүү түстэ. Онон ардаҕа суох кураанах этиҥтэн бүгүн 30-40 баһаар тахсыан сөп», — диэн Айсен Николаев иһитиннэрдэ.
Ил Дархан бу сааскыттан саҕалаан эрэгийиэҥҥэ 901 ойуур баһаара бэлиэтэммитин эттэ.»Бүгүҥҥү туругунан өрөспүүбүлүкэҕэ уопсайа 900 тыһ. га иэннээх 287 баһаар баар. Ойуур баһаардарын умуруорууга оҥоһуллубут норматив быһыытынан биһиэхэ дьоммут тиийбэт. Бу кыһалҕаны РФ Айылҕа ресурсаларыгар министиэристибэтэ билэр. Онон миниистир көмөтүнэн бу методикаҕа уларыйыы киирэн эрэр, — диэн эбэн эттэ.
Сиһилии манна киирэн көрүҥ:
edersaas.ru