Ил Дархан Айсен Николаев бүгүн өрөспүүбүлүкэ Ытык Сүбэтин кытары көрсөн, Саха сирин инники былааннарын туһунан кэпсэттэ. Аҕа көлүөнэ өрөспүүбүлүкэ салалтатын үлэтин-хамнаһын биһириирин биллэрдэ.
Санатан эттэххэ, Ытык сүбэ 2000 сыллаахха Бастакы бэрэсидьиэммит Михаил Николаев көҕүлээһининэн тэриллибитэ. Сүбэ өрөспүүбүлүкэ экэниэмикэтин сайдыытыгар, социальнай эйгэҕэ, о.д.а. боппуруостарга сүбэ-ама, күүс-көмө буолар.
Ытык Сүбэ бэрэссэдээтэлэ Люлия Григорьева дьаҥ-дьаһах кэмигэр өрөспүүбүлүкэ салалтата биир ситимнээхтик үлэлээбитин, ойуур баһаарын умуруорууга, Горнай улууһун Бэс Күөлүн чөлүгэр түһэриигэ күүстээх үлэ барбытын, хотугу улуустарга таһаҕаһы таһыы кэмигэр ыытыллыбытын бэлиэтээтэ. Юрий Коркин манна эбэн өрөспүүбүлүкэ инники сайдыытыгар Өлүөнэ өрүһү туоруур муоста улахан суолталааҕын эттэ.
Оттон социологическай наука дуоктара Ульяна Винокурова Арктика, хотугу улуустарга таһаҕас таһыытыгар, тыа хаһаайыстыбатын бородууксуйатынан хааччыллыга тохтоото. Манна даҕатан кини саха ынаҕын, сылгытын иитии норуот үгэһин илдьэ сылдьарыгар төһүү күүс буоларын эттэ. Тыа хаһаайыстыбатын, тыа сирин сайдыытын туһунан Матвей Мучин эмиэ бэлиэтээтэ. Кини: “Бу кэлиҥҥи сылларга төһө да аан дойду үрдүнэн дьаҥ-дьаһах турбутун, араас хааччах киирбитин үрдүнэн биһиги өрөспүүбүлүкэбит тэтимин ыһыктыбакка сайдан баран иһэр. Тыа сирин сайыннарыы, чуолаан хотугу улуустарга болҕомто күүһүрбүтүн, бэлиэтээн этиэм этэ. Ону таһынан араас хайысханан тутуулар бара тураллара киһини үөрдэр. Наука дьоҕус академията, сүрэҕи, тымыры эмтиир диспансер тутулуннулар”, – диэн иһитиннэрдэ.
Түмүккэ Ытык Сүбэ чилиэннэрэ Арассыыйа бэрэсидьиэнэ Владимир Путин тас дойдуга анал операция оҥорбутун өйүүллэрин эттилэр. “Маннык кэмҥэ биһиги биир сомоҕо буоларбыт, санаабытын түмэрбит наада”, – диэн бэлиэтииллэр кинилэр.
Аграфена КУЗЬМИНА