Ил Дархан өрөспүүбүлүкэ олохтоохторугар туһаайыыта

Бөлөххө киир:

Бүгүн, алтынньы 7 күнүгэр,  СӨ Ил Дархана Айсен Николаев быһа биэриигэ таҕыста. Кини норуокка туһаайан маннык эттэ:

— Ытыктабыллаах Сахабыт сирин дьоно-сэргэтэ, олохтоохторо.  Коронавирус дьаҥа туран, суһал бэлэмнэниигэ олорбуппут  номнуо сэттис ыйыгар барда. Хааччахтаныыны үчүгэйдик тутуһаммыт коронавирус дьаҥын тарҕаныыта аччаан, сорох миэрэлэри устубуппут. Ол эрээри, коронавирус дьаҥын иккис долгуна кэллэ, — диэтэ.

Ол курдук, коронавирустаабыттар уопсай ахсааннарыттан, Дьокуускайга 70%  киһи дьаҥныырын, балаһыанньа уустугун эттэ. Улуустарга, бэл, кыра нэһилиэктэргэ ыарыы тарҕаммытын ыйда. Дьон кэлин санитарнай ирдэбили тутуспат буолбутун, мааска кэппэккэ сылдьарын, дьон-сэргэ тоҕуоруһар сиригэр мусталларын эттэ. Ким да хааччахтанан олоруон баҕарбатын бэлиэтээтэ. Ол эрээри, санитарнай ирдэбили кэспит тэрилтэ тута сабылларын туһунан тоһоҕолоото. Ил Дархан мэдиссиинискэй маасканы кэтии уонна элбэх киһи тоҕуоруһар сириттэн, дьонтон тэйиччи сылдьыы ыарыы тарҕаныытыттан син биир көмүскүүрүн бэлиэтээтэ.

Дьону эппиэтинэстээх буоларга, уопсай балаһыанньаны өйлөөн ылыналларыгар ыҥырда. Билигин быраастар 40% коронавируһу утары үлэлии сылдьалларын бэлиэтээтэ. Атын ыарыылар эмиэ баалларын, быраастар биир сынньалаҥа суох үлэлии сылдьалларын эттэ. Иккис долгун кэлбитинэн, эбии  инфекционнай куойкалар арыллыбыттарын, 70% номнуо толорутун иһитиннэрдэ. Салгыы маннык бардаҕына, балаһыанньа өссө уустугуруо диэтэ. Дьаҥ-дьаһах тарҕаныыта хас биирдии киһи төһө эппиэтинэстээҕиттэн тутулуктааҕын тоһоҕолоон эттэ. Үөрэх чааһыгар, билигин хас биирдии оскуола, оҕо саада хонтуруолга сылдьарын, ханнык эмэ оскуолаҕа ыалдьыбыт оҕо көһүннэ да, ол  оскуола дистанционнай үөрэххэ көһүөҕэ диэтэ. Кини тэрилтэлэр салайааччыларын, чуолаан, улуус уонна нэһилиэк баһылыктара  эппиэтинэстээх буолалларыгар ыҥырда. Иккис долгуну этэҥҥэ аһарар туһуттан, бары эппиэтинэһи ылынан өйөһөргө уонна аҕам саастаахтарбытын харыстыырга, ирдэбили тутуһарга соруйда.

Ульяна Захарова.

+1
0
+1
0
+1
0
+1
0
+1
0
+1
0
+1
0